Студијата, објавена во списанието Јуросрвејланс, е спроведена од истражувачи од Универзитетот Упсала во Шведска, Норвешкиот институт за јавно здравје и Универзитетот Сиднеј во Австралија.
„Шведска беше нето извозник на вирусот Сарс Ков-2 во соседните нордиски земји во првата година од пандемијата“, изјави Џон Петерсон од Универзитетот во Упсала за шведската ТВ станица СВТ во вторникот.
Откриено е дека Шведска презела премногу слаби мерки за да го запре ширењето на вирусот во раните фази на пандемијата, за разлика од другите скандинавски земји, што резултираше со првично голем број инфекции и на крајот доведе до мутација на вирусот, тврдат истражувачите.
Студијата се заснова на анализа на примероци од 71.000 пациенти, што им овозможи на научниците да го анализираат генетското потекло за ширење на вирусот во нордискиот регион.
Синџирите на инфекција се формираа во Шведска пред да ги преминат државните граници во неколку стотици случаи.
„Нашите резултати покажуваат дека шведската стратегија на порелаксирани мерки има влијание врз епидемиолошката состојба во земјата, но и во целиот нордиски регион“, наведуваат авторите на студијата.
Сепак, студијата исто така забележува дека Шведска, како и Данска, е транзитна земја.
Финска беше особено погодена, и покрај строгите ограничувања за патување. Научниците наведоа дека вирусот со себе го донеле Финци кои немале забрана за влез во Шведска.
