Дваесет илјади луѓе учествуваа на дводневниот фестивал на отворено Веркнипт на 3 и 4 јули. Првиот ден се заразиле најмалку 448 учесници, а вториот 516 учесници, објави агенцијата АНП.
По објавувањето на веста во вторникот вечерта, организаторите беа во шок и тврдат дека ги почитувале сите мерки.
Посетителите на влезот требаше да покажат или потврда за вакцинираност или негативен тест за ковид-19.
На 26 јуни Холандија ги укина скоро сите епидемиолошки мерки и дозволи поголеми собири, под услов учесниците да имаат сертификат за вакцинираност или негативен тест.
По експлозијата на нови случаи, повторно беа воведени некои ограничувања. Во последните 24 часа откриени се 8.000 новозаразени лица, а дневниот просек во последните седум дена е 300 заразени на 100.000 жители.
Според здравствените власти, тинејџерите и младите возрасни се најодговорни за растот. Центрите на зараза главно се фестивали, дискоклубови и ресторани.
