Неговото предупредување следи откако пред рускиот Ден на победата во Ереван беше одржан самит на Европската политичка заедница. Володин потсети дека ерменскиот премиер Никол Пашинјан поканил бројни странски гости во Ереван, вклучувајќи го и украинскиот претседател Володимир Зеленски.
„Денес на сите им стана јасно прашањето: како ќе се развиваат односите по ваквите потези на Пашинјан? Дали нашите земји ќе бидат поблиску или подалеку една од друга? Дали ќе има помалку или повеќе тензии во односите? Најверојатно второто. Неизбежно се наметнува паралела: токму така почна сè во Украина. Дали на обичните граѓани на Ерменија им е потребно ова?“, напиша Володин на својот канал на платформата Макс.
Тој додаде дека Русија има едни од најблиските и најдобрите односи со ерменскиот народ и дека во Русија живеат речиси исто толку Ерменци колку и во самата Ерменија. „Во Русија, Ерменците го реализираат својот потенцијал рамноправно со другите народи, држат јавни функции, ги бираат во парламентот и им помагаат на своите семејства и роднини во Ерменија“, кажа Володин.
Претседателот на Думата се осврна и на можни критики за неговите изјави.
„Предвидувам изјави како: „Ние сме суверена држава и можеме да правиме што сакаме“. Никој не зборува за суверенитет или мешање. Станува збор за морал и чесност. Или ги имате или ги немате. Можете да вршите високи функции, но тоа не значи дека ги имате тие квалитети“, нагласи тој.
Според него, односите на Русија со другите земји се засновани на пријателство, меѓусебно корисна соработка и немешање во внатрешните работи на суверените држави. „Каде што овие односи се развиваат сеопфатно, тие прераснуваат во стратегиско партнерство, па дури и во сојуз“, кажа Володин.
Тој додаде дека руската Дума, и покрај различните политички фракции и различните ставови на претставниците, се обидува да направи сè за дополнително да го зајакне пријателството меѓу народите. „Тоа е принцип на кој доследно се придржуваме“, заклучи тој.
Односите меѓу Ерменија и Русија се влошија во последните години. Поранешната советска република во 2024 година го замрзна членството во одбранбениот сојуз ОДКБ предводен од Русија, откако Русија не успеа да ја одбрани од Азербејџан и изрази интерес за приклучување кон Европската Унија, што го налути Кремљ.
