Изворите, кои зборувале под услов да останат анонимни, рекле дека американските разузнавачки служби сѐ уште не донеле конечен заклучок за можна руска вмешаност во нападите врз објектите на ЦИА. Сепак, тие ја посочуваат ефикасноста и очигледната прецизност на нападите, како и пошироката техничка поддршка што Русија му ја дава на Иран, како можни индиции.
Ројтерс и други медиуми претходно објавија, а американски претставници потврдија, дека Русија му обезбедувала на Иран податоци за гаѓање и друга поддршка при нападите врз американски цели во регионот на Заливот. Но истрагата за можна руска улога конкретно во нападите врз објектите на ЦИА досега не беше јавно објавена.
Според Ројтерс и други медиуми, најмалку два објекти на ЦИА биле погодени во март. Едниот бил станицата на ЦИА во американската амбасада во Ријад, а другиот се наоѓал во источен Ирак. Дел од изворите велат дека биле погодени и други објекти на агенцијата, но не откриваат детали.
Разузнавачки меморандум
Еден внатрешен меморандум на една западна разузнавачка служба, кој го опиша регионален претставник што имал увид во документот, заклучува дека Русија најверојатно имала улога во таргетирањето на регионалните објекти на ЦИА.
Двајца западни претставници во Заливот, кои биле информирани за разузнавачките извештаи, рекле дека аналитичарите сметаат оти во нападот врз Ријад биле употребени две модифицирани верзии на иранските беспилотни летала „шахед“, унапредени со руска технологија.
Според нив, едниот дрон пробил ранлив дел од надворешниот ѕид на амбасадата, а вториот влегол низ отворот и експлодирал. Во нападот немало загинати или повредени.
Иако руската помош за Иран трае со години, поради блиските односи меѓу двете земји, евентуалното гаѓање на чувствителни објекти на ЦИА би покажало дека Москва е подготвена да оди чекор понатаму во попречувањето на американските операции, додека Вашингтон се обидува да ѝ стави крај на војната со Иран.
Загриженоста дополнително се зголеми викендов по нападот врз американската воздухопловна база во Јордан, кога Иран со балистички ракети погоди армиски касарни и уби двајца американски војници.
Белата куќа го упатила барањето за коментар до ЦИА, која одбила да коментира. Иранската мисија во Обединетите нации, руското Министерство за одбрана и властите на Саудиска Арабија не одговориле на барањата за коментар.
Подобрени дронови
Западните претставници велат дека Русија му помогнала на Иран да ги подобри способностите на дроновите „шахед“ за попрецизно погодување цели и дека аналитичарите се сомневаат оти токму тие верзии биле употребени при нападот врз Ријад.
Според друг извор, Москва му помогнала на Техеран да ја зголеми прецизноста на моделот „шахед-136“ со испорака на сателитскиот навигациски систем Комета-М, за кој експертите велат дека е многу попрецизен и потешко се попречува од иранските системи.
Волстрит џурнал уште во март објави дека Русија му го испорачала системот „Комета-М“ на Иран, но Кремљ тогаш ги отфрли тие информации како „лажни вести“.
Објектите на ЦИА во странство ги вклучуваат главните канцеларии на агенцијата во поединечни држави, кои најчесто се сместени во американските амбасади и се познати како станици. Покрај нив, ЦИА располага и со канцеларии, безбедни куќи, логистички центри и други објекти поврзани со надзорни и оперативни активности.
Нивните локации се строго доверливи.
Изворите не сакаа да го откријат точниот број или местоположбата на погодените објекти. Еден од нив изјавил дека биле погодени „повеќе од еден, но помалку од десет“ објекти, додека друг навел дека биле погодени неколку локации.
Дали Русија обезбедила податоци за таргетирање?
Американските аналитичари испитуваат дали Иран користел руски податоци за гаѓање при нападот врз американската амбасада во Ријад.
Сепак, остануваат сомнежи. Дел од изворите предупредуваат дека Иран можеби генерално ја таргетирал американската амбасада, а станицата на ЦИА била погодена случајно.
Според нив, некои аналитичари сметаат дека малку држави, освен Русија, имаат капацитет и интерес да обезбедат толку чувствителни разузнавачки информации за таргетирање против САД.
Даниел Хофман, поранешен шеф на станица на ЦИА и офицер за тајни операции, изјави дека не би било изненадување ако Москва му помогнала на Техеран да ги гаѓа објектите на ЦИА, имајќи го предвид нивното стратешко партнерство.
„Тие имаат заеднички интерес да го намалат или целосно да го елиминираат американското влијание во регионите што ги сметаат за своја сфера на влијание“, изјави Хофман.
