Издадени се и предупредувања дека топлината веројатно повторно ќе се интензивира од почетокот на следната недела во земји како Франција и Германија, кои беа најтешко погодени во последните денови.
Во Италија 22 градови, од Болцано на север до Палермо на јужниот остров Сицилија, беа опфатени со црвено предупредување поради топлината.
Аџиите во Ватикан користеа вентилатори за да се разладат и се криеја во сенка под чадори додека папата Лео ја пренесуваше пораката Ангелус од балконот до собраните под него, на празникот на Светите Петар и Павле, неработен ден во Рим.
Во Хрватска метеоролошката служба денес издаде црвено предупредување за неколку региони, вклучувајќи ги Загреб, Сплит и Дубровник.
Десетици пожарникари, со помош на четири летала, се бореа со пожарот што ги зафати боровите шуми на туристичкиот остров Вис во Јадранско Море.
Во Србија Републичкиот хидрометеоролошки институт (РХМЗ) предупреди дека температурите денес ќе достигнат 39 степени Целзиусови.
Албанија го совлада пожарот што во текот на викендот зафати неколку хектари грмушки и маслинови насади во близина на јужното село Клос.
Научниците наведоа дека топлотниот бран, кој почна на 20 јуни, е најлошиот во Европа досега, при што екстремната топлина го наруши производството на електрична енергија, ја оштети инфраструктурата и ги преоптовари здравствените системи.
Франција пријави дополнителни 1.000 смртни случаи за време на топлотниот бран. Француската агенција за јавно здравје соопшти дека повеќето од жртвите поврзани со жештината се постари лица и предупреди дека се очекува бројот да се зголеми.
Топлотниот бран би бил „практично невозможен“ без климатските промени предизвикани од човекот, што ги направи екстремно високите ноќни температури оваа недела 100 пати поверојатни отколку што би биле пред само две децении, велат научниците.
Лука Меркали, претседател на Италијанското метеоролошко друштво, изјави дека се очекува температурите повторно да се зголемат од 5 до 6 јули.
„Погодените области изгледаат во голема мера исто како и за време на првиот бран, вклучувајќи ги Франција, Шпанија, Германија, Италија, Швајцарија и до одреден степен Британија“, изјави тој за Ројтерс.
„Со екстремната топлина, ризикот од шумски пожари се зголемува, но исто така бележиме голем број дождовни бури, што очигледно го ублажува тој ризик“, додаде тој, истакнувајќи дека бурите се многу локализирани, па затоа количеството на врнежи може значително да варира.
Нови трагедии поврзани со жештината беа пријавени во текот на викендот.
Две момчиња од Бугарија, на возраст од осум и десет години, беа пронајдени мртви во загреан автомобил на Кипар во јули попладне, соопшти полицијата. На Кипар, температурите моментално се околу 38 степени Целзиусови, што за ова време од годината на островот во источен Медитеран не е класифицирано како топлотен бран.
Двајца велосипедисти, на возраст од 30 и 71 година, починаа вчера додека учествуваа во трка од серијата Полски велосипедски маратон во Марки, во близина на Варшава.
Температурите во Полска вчера достигнаа нов рекорд од 40,5 степени Целзиусови.
