Путин и Ким минатата година потпишаа договор за стратегиско партнерство што вклучуваше договор за меѓусебна одбрана, а Северна Кореја испрати војници, артилериска муниција и ракети во Русија за да ја поддржи воената кампања на Русија во Украина.
„Во Пекинг детално ги разгледавме нашите односи и перспективи за развој“, и рекол Путин на Чое, осврнувајќи се на разговорите што рускиот лидер ги имаше со Ким минатиот месец за време на прославите во кинескиот главен град по повод 80-годишнината од крајот на Втората светска војна во Азија.
„Сè оди според планот. Ве молам испратете му ги моите најдобри желби“, рекол Путин.
Украина и Јужна Кореја проценуваат дека Северна Кореја распоредила повеќе од 10.000 војници во војната во Украина во замена за економска и воено-технолошка помош од Русија. Разузнавачката агенција на Јужна Кореја во септември процени дека околу 2.000 севернокорејски војници биле убиени во борбите.
Денес во Москва Чое разговараше и со рускиот министер за надворешни работи Сергеј Лавров за билатералните односи и регионалната динамика во Азија.
Според руското Министерство за надворешни работи, двајцата министри се согласиле дека растечките тензии на Корејскиот Полуостров и во Североисточна Азија произлегуваат од „агресивните дејствија на Соединетите Американски Држави и нивните сојузници“.
