„Нека овој договор биде повод во процесот на барање подобри решенија за пофункционално општество во Босна и Херцеговина“, порача Човиќ во Дубровник, пренесува Радио-телевизија Херцег-Босна од Мостар. На самитот на Иницијативата три мориња, Хрватска и БиХ потпишаа договор за гасно поврзување преку таканаречената јужна интерконекција.
Новинарите побараа од лидерот на ХДЗ БиХ да ги коментира заклучоците од конференцијата Традфест одржана во Загреб минатиот викенд, каде што беше заговарано формирање на хрватски ентитет, со образложение дека хрватскиот народ е нееднаков во БиХ.
Без да даде директен одговор, Човиќ кажа: „БиХ мора да признае дека имаме многу проблеми со нефункционалноста и неефикасноста“. Тој додаде дека „трите нации апсолутно не се задоволни од односите во Босна и Херцеговина“ и повика на дијалог.
„Предлагаме да седнеме заедно и да ги пронајдеме најдобрите можни решенија за Босна и Херцеговина да стане европска и ефикасна земја“, кажа Човиќ.
Поради заклучоците од конференцијата во Загреб, министерот за надворешни работи на БиХ Елмедин Конаковиќ испрати дипломатска нота до Загреб, но неговиот заменик Јосип Бркиќ тврдеше дека документот не го претставува официјалниот став на државата. Бројни бошњачки функционери ја осудија конференцијата во Загреб.
