По повод вчерашниот разговор во Белград, Витакер напиша на социјалната мрежа Икс дека имал конструктивна средба со Вучиќ за започнување нова ера во односите меѓу Соединетите Американски Држави и Србија.
„Ја цениме улогата на Србија во регионалната стабилност и со нетрпение ја очекуваме заедничката вежба меѓу Србија и НАТО во мај. Но, бев јасен: соработката на Србија во одбраната и безбедноста со несигурни партнери создава долгорочна стратегиска зависност што е тешко да се демонтира и ја комплицира идната соработка“, порача Витакер.
Тој истакна дека „за модерно партнерство ориентирано кон иднината, стратегиската насока на Србија мора да биде координирана со Западот“ и додаде дека „безбедноста зависи од изборот на вистинските партнери“.
Вучиќ вчера објави дека тој и Витакер разговарале за најважните безбедносни и политички прашања во регионот, позицијата на Србија во сложените геополитички околности и потребата од зачувување на мирот и стабилноста на Западен Балкан.
„Исто така, разменивме мислења за подобрување на односите меѓу Србија и САД, како и за формите на соработка кои можат да придонесат за поголемо меѓусебно разбирање и зачувување на мирот во регионот. Убеден сум дека отворениот разговор е важен, особено во време на големи предизвици и промени во меѓународните односи“, напиша Вучиќ на Инстаграм.
Витакер, кој вчера го посети и Центарот за деминирање во белградската општина Чукарица, денес објави дека во Белград имал „конструктивни состаноци насочени кон нова ера во односите меѓу САД и Србија“.
„Како сигурен партнер, градиме сојуз ориентиран кон иднината, насочен кон трајна стабилност во регионот. САД планираат дополнителни 1,5 милиони долари за деминирање – покрај веќе инвестираните 28 милиони долари. Србија има важен избор: иднината на безбедноста и растот со Западот“, порача Витакер на Икс.
