„Триколорите“ имаа иницијатива во текот на целиот натпревар и долго ја контролираа играта, но тешко создаваа чисти шанси против добро организираната одбрана на Парагвај. Јужноамериканската селекција успешно ги затвораше сите приоди кон својот гол, па Французите не успеваа да го пронајдат патот до мрежата.
Одлуката падна во 70. минута, кога резервистот Дезире Дуе беше соборен во казнениот простор. По ВАР-проверката беше досуден пенал, а Килијан Мбапе беше сигурен од белата точка и ги постави конечните 0-1. До крајот Франција рутински ја зачува предноста и обезбеди место меѓу осумте најдобри репрезентации на турнирот. За Мбапе ова беше седми погодок на Мундијалот, со што се израмни со Лионел Меси на врвот на листата на стрелците.
Во четвртфиналето Франција ќе ги одмери силите со Мароко, кој во претходната рунда убедливо ја елиминира Канада со 3-0. Натпреварот ќе се игра во четврток од 22:00 часот во Бостон.
