Меки уши, ситни шепи и преслатки очи – изборот на кученце од расата алјаски маламут не беше тежок за сопственичката од Велика Британија, Ејми Шарп. Но, како што нејзиниот четириножен пријател растел со неверојатна брзина, така растела и одговорноста.
„Неговото ремче за околу глава е големо колку нечиј ремен. Не мислевме дека ќе порасне толку голем“, раскажува Ејми за Би-би-си низ смеа.
Мал сега има пет години и целосно е пораснат, тежок е 82 килограми.
Голем е речиси колку пони, но големите кучиња отсекогаш биле дел од животот на Ејми. Кога нивното 13-годишно куче хаски умрело, семејството одлучило да земе кученце од расата алјаскански маламут – раса која првично се користела како куче за влечење санки, позната по својата издржливост и сила.
Мал сега води многу помирен живот, но Ејми вели дека неговата сила сè уште е јасно видлива – особено кога го води на прошетка.
„Постојано ме прашуваат: кој кого шета?“, вели таа. „Луѓето се вртат да нѐ погледнат, а кога поминуваат покрај нас, може да се види во нивните очи – се прашуваат што гледаат.“
Според Американскиот кинолошки клуб, алјаските маламути се именувани по племе кое се населило во северозападна Алјаска.
Организацијата ПДСА наведува дека обично тежат помеѓу 34 и 39 килограми и имаат специјално „двојно крзно“ кое им помага да издржат арктички температури.
Ејми вели дека дури и не забележала колку многу пораснало нејзиното куче сè додека не почнало да ги надраснува својот појас и ремче.
„Само стануваше сè поголемо и поголемо“, вели таа.
Иако може да биде „многу гласен“ и „зборлив“, Ејми не жали за својата одлука.
Таа би им препорачала на сите да истражат пред да купат куче од голема раса, но признава дека нејзиниот живот сега е неразделно поврзан со нејзиниот крзнен џин.
„Тој е нежен џин. Тоа е светот на Мал – ние едноставно живееме во него.“
