Што се крие во срцето на Трансилванија кога ќе падне ноќта? Додека повеќето туристи ги бараат замоците на Дракула, локалното население зборува за едно многу поморничаво место – шумата Хоја Бачу.
Трансилванија е позната по своите легенди за вампири, а оваа шума крие мистерии што надминуваат сè што Брам Стокер можел да замисли. Таму нема романтизирани вампири – само необјаснива реалност што им пркоси на природните закони и на здравиот разум, пренесува Гардијан.
„Ова место го нарекуваат Бермудски триаголник на Трансилванија. Толку многу луѓе исчезнале овде што некои велат дека е портал кон друга димензија“, вели туристичкиот водич Мариус Лазин.
Тој води ноќни прошетки низ она што често се опишува како најопседната шума во светот – област наречена Хоја Бачу, на работ на романскиот град Клуж-Напока.
Тој доаѓа таму три ноќи неделно веќе 12 години, но и тој е малку вознемирен додека свети со рефлекторска ламба кон закривениот ѕид направен од брест и бука, кој изгледа толку густо што би можел да биде граница на познатиот свет.
Историски легенди и исчезнувања
Лазин со фенерче покажува кон неколку пара на витки дрвја букви, во својата симетрија, со гранки преплетени во лакови – дали се тоа порти или ѕвездени врати, би можеле да помислите ако имате бујна имагинација.
„Многумина влегле тука и никогаш не излегле. Но, не грижете се, нашите патувања имаат 100 проценти стапка на враќање“, додаде тој.
Извештаите за чудни настани таму датираат од пред векови: шумата го добила името по локален овчар за кој се вели дека исчезнал одамна со 200 овци. Но, областа доби меѓународно внимание во 1968 година, кога воениот техничар Емил Барнеа фотографирал нешто што го опишал како НЛО како лебди над кружна чистина во центарот на шумата.
Во следните децении, Хоја Бачу привлече бројни јогини, шамани, уфолози и истражувачи на натриродното од целиот свет, љубопитни да ги доживеат чудните енергии за кои се вели дека резонираат низ шумата.
Иако можеби е едно од главните места за поклонение во светот за љубителите на натприродни настани, се наоѓа под закана. Западните предградија на Клуж-Напока – модерен технолошки центар со повеќе од 400.000 луѓе, опишан како Силиконската долина на Источна Европа – се протегаат низ шумата, а сè повеќе се бараат дозволи за сечење дрвја за изградба на станбени блокови.
Натприродни феномени и туристички искуства
Водичот раскажува народни приказни и наводни натприродни настани: една од приказните раскажува за петгодишно девојче кое исчезнало за време на семеен пикник, за да се појави повторно пет години подоцна без сеќавање што ѝ се случило, не остарела ниту еден ден, а облеката ѝ била чиста.
Вообичаени се извештаи за мобилни телефони и камери кои необјасниво се исклучуваат при влегување во шумата. Некои пријавиле дека добиле чудни осипи на кожата, слушале шепотење меѓу дрвјата или чувствувале раце како ги фаќаат или туркаат, дури и кога биле сигурни дека се сами.
Лазин, исто така, ги покажа познатите фотографии од НЛО што ја истакнаа шумата Хоја Бачу кон меѓународно внимание во 1960-тите. Зрнести и еднобојни, тие изгледаат како да прикажуваат летачка чинија во облик на копче како лебди над дрвјата.
„Многу од старите истражувачи кои биле во шумата завршиле на психијатриски одделенија. Дали комунистичкиот режим ги сместил таму? Или навистина им се случило нешто тука, во шумата?“, се прашува Лазин.
Многу од приказните можеби не може да се проверат, но шумата е навистина многу чудна. Наоколу има дрвја чии стебла се навалени и извиткани во најнеобични форми како во бајките. Некои се наведнуваат нанадвор, нивните круни исчезнуваат во црнилото на ноќта, слични на џиновски куки за месо што висат од небото. Други се спуштаат како стопени свеќи или се навалени во чудни, спирални обрасци, што на крајот создава морничава атмосфера.
За деформираните дрвја се понудени различни објаснувања: дека ураганските ветрови можеби ги навалувале кога биле млади фиданки или дека природно високите нивоа на зрачење во земјата го предизвикале нивниот чуден раст. Но, научните истражувања не пронашле задоволителни докази за ова.
Екскурзиите на Лазин им овозможуваат на посетителите да учествуваат во мало сопствено научно истражување. На чистина меѓу дрвјата, каде што Барнеа ги направил своите познати фотографии од НЛО, водичот им подава на туристите ЕМФ мерач за „лов на духови“, кој мери електромагнетни полиња.
Единствената зелена површина е кратката трева – јасно е дека не е косена и изгледа дека оваа чудна чистина е природна, а не дело на човечка рака.
Сепак, мерачот на електромагнетно поле не регистрираше никаква посебни активности.
„Во шумата Хоја Бачу границата помеѓу реалноста и фантазијата е многу тенка“, заклучува водичот Лазин за таа застрашувачка локација која предизвикува големо внимание.
