СДСМ, под актуелното раководство, го доживеа најголемиот изборен пораз во својата историја, велат од ЗНАМ.
„Нивните кандидати за градоначалници беа избришани уште во првиот круг во повеќе општини, и тоа во Куманово, нивниот ‘чесен и докажан’ кандидат Мартин Костовски, не успеа да влезе ниту во вториот круг и заврши на срамното четврто место, додека нивниот кандидат за градоначалник во Центар, Горан Герасимовски, ќе биде убедливо поразен во вториот круг. Толку за нивните ‘планови, ‘сила’ и ‘рејтинг’. Ја разбираме потребата на ова раководство на СДСМ да се обиде политички да преживее дури и по ваков дебакл на локалните избори. Но, она што се случи е доказ дека СДСМ повеќе не е партија, најмалку ‘најсилна опозициска партија’, туку распаѓачки остаток од некогашен систем што живее само на инерција и старо име“, велат од ЗНАМ.
За ЗНАМ, СДСМ е политички труп што глуми живот додека се гуши под тежината на сопствениот криминал и лаги, без визија, без морал.
„Колку и да се обидуваат да ја префрлат вината, фактите се сурови: СДСМ не изгуби поради ВМРО ДПМНЕ, ниту поради ЗНАМ – изгуби поради себе, поради ароганцијата, криминалот и отуѓеноста од народот. Изгуби затоа што одамна ги заменија идеологијата и вредностите со личните интереси! Движењето ЗНАМ не е ничиј тројански коњ, ниту придружна партија во туѓи игри. ЗНАМ расте, и тоа благодарение на граѓаните што веруваат дека чесноста, принципите и работа во нивен интерес сè уште имаат смисла. На овие локални избори ЗНАМ ги оствари зацртаните политички цели,ја потврди стабилизацијата на своето гласачко тело и покажавме дека политиките што ги водиме се во вистинска насока“, велат од ЗНАМ.
Од партијатна на СДСМ ѝ порачаа да се ресетира и да „излезе од канџите на муртинските коруптивни мрежи кои ги држат заробени“.
„Ослободете се од продолжената рака на Заев, Венко Филипче и криминалците што ја претворија партијата во приватна фирма и политички сервис на неколкумина. Го изгубивте целосно достоинството, ја изгубивте довербата и контактот со народот!“, велат од ЗНАМ.
