„Не можам да поверувам дека постојат толку несовесни поединци кои на ваков начин третираат диви животни, а притоа ја загрозуваат безбедноста на своите сограѓани. Ова не е само неодговорност, туку сериозна опасност за целата околина.
Волкот е згрижен од службите на Скопската зоолошка градина, а институциите очекувам да ги преземат сите неопходни мерки и целосно да го расчистат случајот!
Во Скопје мора да има ред! Мора да изградиме похумано, побезбедно и одговорно општество во кое законите важат за сите, а животните се третираат со грижа, а не како предмет за нечие иживување“, напиша на својот фејсбук-профил скопскиот градоначалник.
Како што дознаваме, волкот бил фатен во скопската населба Козле, бил врзан со ланец за бандера, и како што соопштија од скопската зоолошка градина „бил мирен и питом“. Тој е безбедно транспортиран до градината и во наредниот период ќе биде во карантин под постојан здравствен надзор од стручни лица. Интервенирале припадници на МВР, на стручната служба од ЗОО Скопје и претставници од Град Скопје.
Од Зоолошката градина апелираат дека чување диви животни како домашни миленици е забрането и исклучително опасно.
Волците не се миленици и не смеат да се чуваат во заробеништво и несоодветни услови. Станува збор за диви животни кои имаат свои природни потреби, инстинкти и однесување, нагласуваат од зоолошката и апелираат до граѓаните доколку забележат нелегално чување диви животни, да го пријават до надлежните институции.
