Мицкоски вчера ги повика и другите пратеници, кои мислат дека оваа Влада на Заев не е добра, да се потпишат на иницијативата. Новото собраниско мнозинство го сочинуваат пратениците на ВМРО-ДПМНЕ, Алијанса за Албанците и Алтернатива, Беса и Левица.
Според собранискиот Деловник, претресот и гласањето за недоверба на Владата се одржуваат третиот ден од денот на поставувањето на прашањето.
Од СДСМ нема информација за тоа кога Заев писмено ќе ја поднесе оставката и додаваат дека тој не го повлекува зборот дека ќе се повлече, но нема да се ориентира според туѓи ултиматуми.
Според Деловникот за работа на Собранието, прашање за доверба на Владата може да поднесат најмалку 20 пратеници, во писмена форма и со образложение. Потоа, спикерот Талат Џафери прашањето за доверба веднаш го доставува до пратениците, Владата и претседателот на државата.
Членот 215 од Деловникот предвидува дека за поставеното прашање за доверба на Владата, претседателот на Собранието веднаш свикува седница, која се одржува третиот ден од денот на поставувањето на прашањето. Расправата може да се води до полноќ, кога треба да се гласа. Ако на Владата ѝ е изгласана недоверба, премиерот до Собранието поднесува оставка во рок од 24 часа.
Ако Заев сепак ја поднесе оставка пред да биде поднесено барање за доверба, тогаш претседателот на Собранието е должен на првата наредна седница само да ја констатира оставката, без расправа или гласање.
