Министерот Мисајловски, како што соопшти Канцеларија за воени односи со јавноста, ГШ на Армијата, заедно со началникот на Генералштабот на Армијата, генерал-мајор Сашко Лафчиски, го пречекаа американскиот амбасадор во НАТО во касарната „Илинден“ во Скопје, каде што разговараа за инвестициите во Армијата, исполнувањето на НАТО-целите на способности и зацврстувањето на колективната одбрана на Алијансата.
Мисајловски истакна дека одбранбениот буџет е во континуиран раст и се реализира согласно предвидената динамика. Информираше дека 32,5 проценти од државниот Буџет се издвојуваат за набавка на нова и модерна опрема.
Според него, државата е на добар пат до 2035 година да го исполни заеднички договореното ниво од 3,5 проценти од БДП за одбранбениот буџет и дополнителни 1,5 проценти од БДП за активности и проекти поврзани со одбраната.
Началникот на Генералштабот, генерал-мајор Сашко Лафчиски, информираше дека во тек е вежбата „Блесок 26“, во рамки на која ќе се изврши оценување на Лесната пешадиска баталјонска група, при што ја нагласи поддршката од Соединетите Американски Држави и сојузниците за остварување на оваа НАТО-цел на способност.
Во текот на посетата реализирана е и методско-показна вежба од припадници на Баталјонот на специјални сили и Извидувачко-разузнавачкиот баталјон, на која беа презентирани нивните способности, обученост и подготвеност за извршување на сложени мисии.
По завршувањето на вежбата, амбасадорот Витакер изврши обиколка на тактичко-техничкиот збор, каде беа изложени дел од вооружувањето, опремата, возилата и средствата со кои располага Армијата.
На настанот присуствуваа и вршителката на должност шеф на Мисијата на Амбасадата на САД, Никол Варнс, како и генерали и претставници на Армијата, Министерството за одбрана и Амбасадата на САД.
Од Министерството за одбрана оценуваат дека посетата на амбасадорот Метју Витакер претставува потврда за силното партнерство и сојузништво меѓу Македонија и Соединетите Американски Држави.
