Во текот на велигденскиот викенд, додаде, имаше предизвици и затоа се преземени мерки на исклучување на производители на електрична енергија од системот, но може да кажеме дека правиме максимални напори да го стабилизираме системот и да немаме никакви проблеми во целата мрежа.
Македонскиот електросистем бил пред можен колапс за време на велигденските празници, поради големото производство на електрична енергија од фотоволтаичните централи бидејќи струјата немало каде да се продаде, потврди директорот на МЕПСО Бурим Љатифи.
МЕПСО и електродистрибуција од 18 до 21 април по своја проценка ги исклучувале од системот фотоволтаичните централи. Одобрение за тоа, како што изјави Љатифи, дала Регулаторната комисија за енергетика, а компаниите кои се оштетени со оваа мерка нема да бидат обесштетени.
„Ние сме соочени со затекнатата ситуација. Една од мерките што ја направивме е зголемување на фиксниот дел од банкарската гаранција за трговците, согледувајќи ги цените на електричната енергија на европските берзи. На долгорочно ниво сметаме дека наведената сума на фиксниот дел од банкарската гаранција е доволна“, истакна Љатифи во одговор на прашање на денешната прес-конференција во Владата.
Претходно дел од трговците направија долгови кон МЕПСО од околу 10 милиони евра, а во моментов, како што кажа, долгот изнесува околу 7,2 милиони евра.
„АД МЕПСО континуирано спроведува активности за наплата на неплатените парични побарувања на фирмите трговци со електрична енергија кои во текот на енергетската криза направија дебаланси во електроенергетскиот систем и во значителна мера ги ангажираа системските резерви на компанијата. Дел од компаниите со кои е потпишан договорот за репрограмирање на доспеаните, а неплатени фактури континуирано си ги плаќаат сегашните фактури и ратите од репрограмираниот долг со камата. Други во целост ги подмирија долговите, а за останатите се преземени сите правни мерки за наплата, односно покренати се соодветни извршни постапки и постапки по нотарски платен налог. Во моментов долговите изнесуваат 7,2 милиони евра“, посочи Љатифи.
Новиот менаџмент на АД МЕПСО е гарант, како што рече, дека нема да се повторуваат појавните со злоупотреба на менаџерските договори.
„Менаџментот се нафати сериозно да ја поправи ситуацијата. Најпрофесионално и најпосветено уште од првиот ден, па до последниот ден ќе ја вршиме нашата работа и нема да се повторат таквите појави“, вети Љатифи.
