Првиот концерт се одржал во градот Калиш, во катедралата „Св. Никола” по што свештеникот кој раководи со катедралата, организирал прием за хорот на кој била претставена и голема фреска на која биле претставени светите браќа Кирил и Методиј.
Вториот концерт се одржал во концертната сала на универзитетот „Адам Мицкјевич ” во Познањ. За овој концерт, маестро Татарчевски избрал програма со композиции од македонските бардови на хорското творештво како што се Тодор Скаловски, Трајко Прокопиев, Драган Шуплевски, Кирил Македонски и Александар Лековски.
„Посебно впечатливи и позитивни беа бурните реакции на останатите учесници на фестивалот, ансамбли од САД, Германија, Унгарија и Полска кои ги продолжија аплаузот и овациите и откако нашите девојки ја напуштија сцената“, велат од ФМУ.
Освен самостојните концерти, студентките учествувале и на организираните работилници и во заедничката подготовка и изведба на композицијата On – Off од композиторот Зузана Фалковска, специјално создадена за овој настан.
„Ваквите континуирани успешни настапи на хорот „Драган Шуплевски” значат голема афирмација за Факултетот за музичка уметност, УКИМ и за државата во целина и носат покани за учество и на други еминентни музички настани“, велат од ФМУ.
Настапите биле поддржани од Министерство за култура, а се под покровителство на претседателката на државата, Гордана Сиљановска – Давкова по повод 60 години ФМУ – Скопје.
