„На Велигденското утро можеме да констатираме дека руската армија се обидува да создаде општ впечаток за прекин на огнот, додека во некои области продолжува со изолираните обиди да напредува и да ѝ нанесе загуби на Украина. Русија мора целосно да ги почитува условите на прекинот на огнот“, напиша тој на Телеграм.
Тој додаде дека предлогот на Украина за спроведување и продолжување на прекинот на огнот за 30 дена од полноќ останува на маса.
Зеленски понатаму изјави дека имало 59 случаи на руско гранатирање и пет напади од руски единици.
Во регионот Курск, руските сили извршија артилериски напади и користеа беспилотни летала, додаде Зеленски.
„Секаде каде што нашите борци одговараат како што заслужува непријателот, врз основа на специфичната борбена ситуација. Украина ќе продолжи да дејствува реципрочно“, напиша украинскиот претседател.
Зеленски во посебна објава им го честита Велигден на сите христијани, наведувајќи дека „злото може да има свој час, но Бог ќе има свој ден“ и дека порано или подоцна злото ќе се повлече и животот ќе победи.
„Тоа е она што го сакавме сите 1.152 дена. Во ова ние сме обединети. Секој ден – а особено денес, кога Украинците од сите христијански вери го слават Велигден на ист ден. Заедно. Заедно се бориме за Украина. И заедно се молиме за Украина“, додаде тој.
„Нека заврши злиот час. Нека дојде денот на животот. Денот на мирот. Денот на Украина. Денот кој трае со векови. И повторно ќе можеме да се собереме. На една трпеза. За мирен Велигден. Господ нека ни е на помош во ова. Нека е мир. Христос воскресна! Навистина воскресна!“, напиша украинскиот претседател.
Рускиот претседател Владимир Путин вчера нареди еднодневен Велигденски прекин на огнот во Украина од 18 часот во сабота, по московско време, до полноќ во недела навечер.
