Во интервју за Си-ен-ен, тој рече дека постои „голем ризик“ во ставот дека напорите за прекин на борбите во Украина би можеле да бидат одложени додека не се реши конфликтот во Иран.
Во разговор со Кристијан Аманпур од неговата канцеларија во Киев вчера, Зеленски рече дека, и покрај техничките разговори што се водат со Соединетите Држави, тој „не гледа можност за состанок… сè додека не се затвори прашањето за Иран“.
Тој истакна дека е „предизвик“ што истиот американски преговарачки тим – предводен од претставникот Стив Виткоф и зетот на американскиот претседател Доналд Трамп, Џаред Кушнер – ги води разговорите и за Иран и за Украина.
Иако разбира дека САД во моментов се фокусирани на војната во Иран, тој нагласи дека е важно да не се заборави Украина, каде што борбите продолжуваат. Украинскиот лидер рече дека одложувањето не е опција. „Нема да разговараме за Украина „малку подоцна“. Украина не е „малку подоцна“. Украина веќе е во толку голема трагедија, мора да најдеме начин паралелно да се справиме со неа.“
Зеленски, исто така, за Си-ен-ен изјави дека војната ги попречила испораките на клучно оружје за Украина, особено противбалистички ракети. Тој изјави дека Украина не добива доволно од нив поради ограничениот американски производствен капацитет.
Прашање на живот и опстанок
Интервјуто следеше само неколку часа откако Европската Унија конечно одобри клучен заем од 90 милијарди евра за Украина, а Зеленски рече дека добивањето на парите е прашање на „живот и опстанок“ за неговата земја.
Кредитот, ветен на Киев пред неколку месеци, долго време беше одложуван поради блокадата на унгарскиот премиер во заминување Виктор Орбан, кој побара Украина да го продолжи протокот на руска нафта во Европа. Неговиот убедлив пораз на парламентарните избори минатата недела ја отстрани таа пречка. Во среда беше обновен транзитот на нафта низ украинскиот дел од нафтоводот Дружба, а амбасадорите на ЕУ дадоа прелиминарно одобрение за заемот.
Зеленски објасни дека без овие средства, Украина се мачела да произведе оружје со полн капацитет. Како пример, тој ги наведе пресретнувачите на беспилотни летала, за кои рече дека Украина моментално произведува околу 1.000 дневно, иако има капацитет за 2.000. „Но, ние немаме финансиски средства. Ова е навистина прашање на нашиот живот, опстанок, одбрана, итно ни требаат тие пари“, изјави тој за Си-ен-ен.
