Белорускиот претседател Александар Лукашенко денес ги предупреди своите западни соседи и Украина да не преземаат агресија против неговата земја, велејќи дека Минск не сака војна, но ќе се брани со сите средства што му се на располагање.
„Моја задача е да ги предупредам соседите: Естонија, Латвија, Литванија, Полска, а можеби и до одреден степен Украина. Не дај Боже да извршат агресија против Белорусија. Ние не сакаме војна и немаме намера да водиме војна со нив“, рече Лукашенко во интервју за РТ.
Тој нагласи дека не се можни воени операции против Полска и Литванија од територијата на Белорусија, освен ако земјата не биде вовлечена во конфликт и да е принудена да одговори. Во исто време, белорускиот претседател нагласи дека државата ќе возврати во случај на напад.
„Ова не значи дека веднаш ќе употребиме нуклеарно оружје ако има конфликт. Имаме доволно други средства да се спротивставиме“, рече тој. Лукашенко додаде дека, во случај на закана за опстанокот на државата, Русија исто така ќе се вклучи во одбраната на Белорусија, во согласност со меѓудржавниот договор.
„Ако видиме дека опстанокот на Белорусија е загрозен, не само ние, туку и во согласност со нашиот договор со Руската Федерација… воопшто нема да им биде лесно. Ќе искористиме сè што имаме“, рече Лукашенко.
Зборувајќи за иднината на НАТО во контекст на политиката на американскиот претседател Доналд Трамп, Лукашенко оцени дека дури и ако Трамп одлучи да ја укине Алијансата, нема да има доволно време да го спроведе тоа.
„Други луѓе ќе дојдат да го спасат НАТО. И Трамп и неговите соработници разбираат дека НАТО не е само боеви глави и парите на Соединетите Американски Држави, туку огромно геополитичко упориште за САД заедно со сојузниците на Евроазискиот континент“, заклучи Лукашенко.
