Конечната одлука за неговото евентуално отстранување од функцијата ќе биде донесена на посебен состанок на земјите-членки на судот, објави надзорното тело на МКС во Хаг. Состанокот ќе се одржи што е можно поскоро.
Извршниот одбор на надзорното тело на МКС соопшти дека таквата проценка е донесена врз основа на „извештајот од истрагата спроведена од канцеларијата на Обединетите нации за внатрешни надзорни служби (ОИОС), докази, совети од ад хок панел на судски експерти и писмени поднесоци“.
Во 2024 година, блиска колешка го обвини британскиот обвинител за сексуално вознемирување. Кан наводно ја вознемирувал повеќе пати во подолг период и ја принудил да извршува сексуални дејствија, објави ДПА.
Комисија на Обединетите нации ги истражи обвинувањата и го поднесе својот извештај во декември 2025 година, но извештајот не е јавно достапен. Тројца судии од тој меѓународен суд поднесоа правно мислење врз основа на истрагата, но ниту тоа не беше објавено.
56-годишниот Кан рече дека сака да се врати на должност штом ќе се разјаснат обвинувањата, кои тој ги негира.
Кан, како главен обвинител од 2021 година, издаде налози за апсење на израелскиот премиер Бенјамин Нетанјаху и рускиот претседател Владимир Путин, меѓу другите.
Соединетите Американски Држави го зголемија притисокот врз судот, особено во врска со налогот за апсење против Нетанјаху, и воведоа санкции врз персоналот и судиите.
Вкупно 125 земји го потпишаа основачкиот договор на судот, вклучувајќи ги сите земји-членки на ЕУ. САД, Русија и Израел не се членки на судот.
