Маѓар ја обвини владата во заминување на премиерот Виктор Орбан за „целосен грабеж на државната каса“ во последната недела од мандатот и најави дека новата влада веднаш ќе спроведе детална ревизија на буџетските расходи.
„Виктор Орбан целосно ќе ја ограби државната каса во последната недела“, рече Маѓар во објава на социјалната мрежа Фејсбук.
Тој изјави дека, според документите за кои тврди дека ги добил, владата во заминување не само што троши веќе договорени, а неплатени средства, туку презема и нови обврски во голем обем.
„Целта повеќе не е само да се трошат парите што се договорени, но сè уште не се платени, туку да се преземат нови обврски во најголем можен износ. Контролите поврзани со обврските и купувањето средства се целосно укинати, а парите слободно се трошат“, рече Маѓар.
Тој предупреди на, како што тврди, фискалните индикатори што укажуваат дека буџетскиот дефицит на Унгарија би можел да достигне 6,8 проценти од бруто домашниот производ (БДП), што би било далеку над претходно поставените цели од 3,9 проценти, како и подоцна ревидираната проекција од пет проценти.
„Лажеа и лажеа наутро, напладне и навечер…“ изјави Маѓар во остра критика кон владата во заминување.
Тој најави дека партијата Тисза, по формирањето на владата, ќе спроведе целосна ревизија на јавните трошоци, вклучувајќи ги трошоците, договорите, државните институции и компаниите, особено во областа на инвестициите и јавните набавки.
„Владата на Тисза што ќе се формира веднаш ќе го обнови одговорното финансиско управување со буџетот, ќе го запре трошењето на парите на даночните обврзници, ќе стави крај на кражбата и расипништвото“, рече Маѓар.
Тој додаде дека новата влада ќе се стреми да обезбеди јавните пари да не одат во рацете на „неколкумина“, туку да им служат на интересите на сите унгарски граѓани.
„Ги повикувам раководителите на министерствата да не преземаат никакви нови обврски додека не се формира владата на Тисза и да вршат само плаќања неопходни за нормално функционирање“, рече тој.
Како заклучок, тој изјави дека „нема прошка за крадците на унгарскиот народ“, додавајќи дека одговорноста ќе биде политичка, но и поширока, ако продолжи сегашната практика.
Маѓар и неговата партија Тисза победија на изборите во април, со што заврши децениското владеење на Виктор Орбан, а новата влада треба да ја преземе функцијата во мај.
