Лидерите на четири јужно-европски членки на ЕУ разговараа за миграцијата на маргините на неформалниот самит на ЕУ, чиј домаќин беше кипарскиот претседател Никос Христодулидес, во Аја Напа, во близина на Никозија.
Во заедничка изјава издадена по состанокот, четворицата лидери нагласија дека нивните земји, како членки на јужните надворешни граници на ЕУ, се директно изложени на потенцијална неконтролирана миграција, или мигрантска криза, во правец на Европската Унија, поради војната на Блискиот Исток.
Тие соопштија дека разгледале „голем број можни мерки што, доколку е потребно и во целосна согласност со меѓународното право, би ја заштитиле безбедноста и ефикасното управување со надворешните граници на ЕУ“. Во соопштението не се прецизира за какви мерки станува збор.
Лидерите на четирите земји „ја потврдија важноста на унифициран пристап на ЕУ за да се зголеми одговорот на поединечните држави на евентуално значително зголемување на миграциски тек поради конфликтот на Блискиот Исток“, се вели во соопштението.
Во исто време, лидерите на четирите земји им наложија на одговорните министри за внатрешни работи и надворешни работи да продолжат со тесна координација, „вклучително и проучување, во соработка со Европската комисија, на најдобрите начини за интегрирање на националните напори во рамките на релевантните надлежности и иницијативи на ЕУ“, се вели во соопштението.
Соопштението на Кипар го издадоа претседателот на земјата Христодулидес и премиерите на Грција, Киријакос Мицотакис, на Италија, Џорџа Мелони и на Малта, Роберт Абела.
Шефовите на држави и влади на ЕУ пристигнаа на Кипар во четврток попладне на дводневен самит чии главни теми се војната на Блискиот Исток и Украина, консултациите за повеќегодишниот буџет на ЕУ за периодот 2028-2034 година и енергетските проблеми.
На Кипар, по самитот на Европскиот совет, за денес, 24 април, е закажан самит ЕУ-Блискиот Исток, на кој се поканети лидерите на Египет, Сирија, Јордан и Либан.
