Според агенцијата, ракетите погодиле четири локации во градот, што Техеран го опиша како „континуирано кршење на прекинот на огнот од страна на американскиот непријател“.
Нападот следеше по извештаите за експлозии околу стратешки важниот пристанишен град Бандар Абас, како и во Џогатај и Бушер.
Бушер е од особено значење бидејќи во покраината се наоѓа единствената оперативна нуклеарна централа во Иран, поради што секој напад во областа предизвикува дополнителна загриженост за можните последици.
Новите напади се случија откако САД и Иран повторно разменија ракетни напади во текот на ноќта, со што Вашингтон изврши трета ноќ по ред воздушни напади по пропаѓањето на 60-дневниот прекин на огнот меѓу двете земји.
Трамп се заканува дека ќе ја нападне „планината Пијук“
Американскиот претседател Доналд Трамп дополнително ги зголеми тензиите со изјавата дека САД ќе ја нападнат планината (Пијук) Пикакс, локација во близина на тешко оштетениот објект за збогатување ураниум во Натанц.
„Ќе ја уништиме планината Пијук. Кажете им на Иранците да бидат подготвени“, рече Трамп во интервју со радиоводителот Хју Хјуит.
Тој додаде дека американските служби внимателно ја следат локацијата.
„Внимателно ја следиме планината Пијук. Не гледаме никаква активност таму. Не им оди добро со нивната нуклеарна програма. Секогаш кога ќе слушнеме нешто за тоа, ние го уништуваме. Затоа повеќе не сакаат да зборуваат за тоа. Но, веројатно наскоро ќе го погодиме и Пијук“, рече Трамп.
Планината Пијук, или Кух-е Коланг, се наоѓа во близина на нуклеарниот комплекс Натанц и содржи длабоко закопани тунели за кои воените експерти проценуваат дека се надвор од дострелот дури и на најмоќните американски бомби за разбивање бункери.
Трамп, исто така, објави дека САД повторно воведуваат блокада врз иранскиот поморски пат во Персискиот Залив и ќе се погрижат Ормускиот Теснец да остане отворен, „за одредена такса“.
Техеран: Ќе одговориме разорно
На заканите на Трамп реагираше висок безбедносен извор од Техеран, изјавувајќи за Си-ен-ен дека Иран ќе одговори доколку САД ја нападнат планината Пијук.
„Доколку Трамп ги оствари своите закани, ние ќе одговориме разорно, а цената ќе ја платат американските војници и неговите регионални партнери“, рече неименуваниот функционер.
Тој ги отфрли американските тврдења дека на планината Пијук се одвиваат нуклеарни активности, нарекувајќи ги лажни.
Зборувајќи за Ормускиот Теснец, кој Иран го прогласи за затворен во текот на викендот, истиот извор рече дека Техеран „нема да се откаже од одбраната на правата на иранскиот народ“.
Тој додаде дека евентуалниот американски напад врз планината Пијук „нема да има никакво влијание врз спроведувањето на плановите на Иран во Ормускиот Теснец“.
