Размерот на разурнувањето е неспоредливо поголем од она што американската влада досега јавно го призна. Поради постојаната закана од воздух, некои американски бази станале премногу опасни за престој, па командантите уште на почетокот на војната ги повлекле повеќето трупи надвор од дострелот на иранските ракети.
Од почетокот на конфликтот на крајот на февруари, седум војници се убиени во напади врз американски објекти во регионот – шест во Кувајт и еден во Саудиска Арабија, додека повеќе од 400 се ранети, потврди американската војска. Иако повеќето од ранетите брзо се вратиле на должност, најмалку 12 војници претрпеле сериозни повреди, изјавиле американски извори под услов да останат анонимни.
Сателитските снимки од Блискиот Исток се исклучително тешко достапни во моментов. Двата најголеми комерцијални понудувачи, Вантор и Планет, го исполнија барањето на нивниот најголем клиент – владата на Соединетите Американски Држави – да го ограничат, одложат или целосно да го забранат објавувањето на снимки од регионот додека војната продолжува. Таа блокада, воведена уште во втората недела од конфликтот, го оневозможила независното проценување на иранските напади.
Меѓутоа, иранските државни агенции од самиот почеток на социјалните мрежи редовно објавуваа сателитски снимки со висока резолуција за да ја докажат штетата нанесена на американските цели. Вашингтон пост анализирале повеќе од 100 такви снимки и ја потврдиле автентичноста на 109 од нив споредувајќи ги со оние од европскиот систем Коперникус и достапните архиви на Планет. Тие не нашле докази дека Иранците манипулирале со фотографиите.
Анализата открила вкупно 217 уништени или оштетени објекти и 11 парчиња воена опрема во дури 15 американски воени бази во регионот. Експертите заклучуваат дека Американците сериозно ги потцениле можностите на Иран, не се прилагодиле на современото војување со беспилотни летала и ги оставиле базите незаштитени.
„Нападите на Иран беа неверојатно прецизни. Никаде нема кратери што би укажувале на промашувања“, вели Марк Канцијан, пензиониран полковник на американските маринци и советник во Центарот за стратегиски и меѓународни студии. Вашингтон пост претходно откри дека Русија му обезбедува на Иран разузнавачки информации за напади врз американските сили.
Сликите покажуваат дека нападите уништиле бројни касарни, хангари и магацини во повеќе од половина од американските бази вклучени во анализата.
„Иранците намерно гаѓале згради за сместување на луѓе за да предизвикаат масовни жртви“, смета Вилијам Гудинд, истражувач во проектот „Контролирана земја“. „Тие не удираа само по опрема, нафта и инфраструктура, туку гаѓаа и меки цели – теретани, мензи и касарни“.
Сателитскиот центар во базата Ал-Удеид во Катар, делови од противвоздушниот систем „патриот“ во Бахреин и Кувајт, електраната во Кемп Буринг во Кувајт и пет објекти за складирање гориво се исто така погодени. Повеќе од половина од вкупната штета е регистрирана во базата на 5-та флота во Бахреин и во три бази во Кувајт.
Американски функционери се сомневаат дека базите во Бахреин и Кувајт толку многу настрадале затоа што тие земји им дозволиле на Американците да почнат офанзивни напади од нивна територија, вклучително и употреба на моќните ракетни системи ХИМАРС.
Експертите се согласуваат дека ранливоста на Америка е резултат на неколку клучни грешки. Кели Гриеко од Центарот Стимсон вели дека САД потцениле колку добро Иран го познава распоредот на американската инфраструктура. Покрај тоа, американските и израелските противвоздушни системи веќе биле опасно истрошени.
Според проценките, американската војска испукала најмалку 190 ТХААД и 1.060 пресретнувачи „патриот“ помеѓу крајот на февруари и почетокот на април, користејќи повеќе од 40 проценти од нивните предвоени залихи.
„Тие одлично ја вршат работата со соборување ракети, но цената на потрошените ракети е огромна“, објаснува Џастин Бронк, британски воен аналитичар. Дополнително, војската не знаела како да се брани од самоубиствени напади со беспилотни летала, лекција што требало да ја научат од војната во Украина.
Посебен проблем е недостигот од бункери кои би ги заштитиле војниците и опремата. На пример, командниот центар во Кувајт, каде што шестмина Американци беа убиени во ирански напад со беспилотно летало, речиси и немал противвоздушна одбрана. Во Саудиска Арабија, команден авион вреден стотици милиони долари беше уништен бидејќи постојано беше паркиран на истото, незаштитено место.
Централната команда на САД (Центком) одбила конкретно да коментира за овие наоди, велејќи само дека проценките за штетата се „сложени, а понекогаш и погрешни“. Но, еден американски функционер призна дека штетата во седиштето на 5-та флота била „обемна“ и дека главната команда веќе се преселила во база во Флорида. Малку е веројатно дека војската ќе се врати „скоро“ во голем број во базите на Блискиот Исток.
„Поминавме од ерата на невидливост во време во кое целото бојно поле е целосно провидно“, заклучува пензионираниот офицер на воздухопловните сили Максимилијан Бремер. „Имаме впечаток дека треба да напаѓаме, но во моментов само грчевито се браниме околу овие бази“.
