Обезбедувајќи договор со Иран, Трамп кажа дека ќе го насочи своето внимание кон обидот за посредување во мир меѓу Украина и Русија, а истовремено ќе се обиде да ги прекине борбите во Либан.
„Вчера имавме многу добар разговор со претседателот (Володимир) Зеленски и со претседателот (Владимир) Путин, и мислам дека можеби можеме да направиме нешто на тоа поле. Навистина мислам така. Мислам дека двајцата се отворени за тоа“, кажа тој.
На самитот во одморалиштето Евиан-ле-Бен, Трамп требаше да присуствува на работен состанок со украинскиот претседател Зеленски, чија позиција се подобри откако Трамп му се налути во Овалната соба минатата година. Украина бара повеќе воено финансирање од своите сојузници по серијата напади врз Киев.
Зеленски вчера изјави дека понудил средба со рускиот претседател Путин на самитот на Г7 за да разговараат за завршување на нивната војна која трае повеќе од четири години, но кажа дека Путин не бил подготвен да разговара.
Останува отворено прашање дали Зеленски ќе успее да добие поголема американска поддршка додека Трамп дава приоритет на финализирањето на иранскиот конфликт, што го загрози неговиот рејтинг на домашен терен.
Обезбедувањето гаранции од Трамп може да биде тешко. Лидерите од Г7 го сметаат за нестабилен партнер, а многумина се директно погодени од едностраните одлуки на Трамп кои ги превртеа наопаку Блискиот Исток, глобалната трговија и дипломатијата и предизвикаа подлабоко преиспитување на посветеноста на САД кон повоениот светски поредок која самите го воспоставија.
Последиците од војните во Источна Европа и Блискиот Исток се само едно од неколкуте прашања со кои лидерите на Г7 ќе се справат за време на самитот од 15 до 17 јуни. Лидерите ќе бараат и заедничка основа за решавање на економската нерамнотежа во светот, алтернативна набавка на клучни минерали од Кина и прашања за вештачката интелигенција.
