Лекарите изјавија дека во израелски воздушен напад е убиена жена во градот Завајда во централниот дел на Појасот Газа, додека во друг напад е убиено едно лице во блискиот бегалски камп Нусеират. Подоцна вчера во израелски воздушен напад во градот Газа беа убиени две лица, еден лекар и неговиот син, соопштија здравствените власти.
Израелската војска објави дека убила двајца милитанти на Хамас во одделни напади врз Појасот Газа. Израел тврди дека милитантите планирале да извршат напади врз израелските трупи, без да даде какви било докази.
Насилството доаѓа во време кога Николај Младенов, претставник на Одборот за мир на Доналд Трамп, требаше да пристигне во Каиро, еден ден откако Хамас го достави својот одговор на неговиот мировен план од 15 точки.
Изворите велат дека Хамас и другите фракции се согласиле за сите точки освен за разоружување на Хамас, кое групата го поврзува со повлекување на Израел и политички пат кон преговори за палестинска државност. Примирјето од октомври 2025 година, постигнато со посредство на Трамп, не успеа да ги спречи израелските напади во Газа, ниту да обезбеди разоружување на милитантите на Хамас.
Израел и Хамас остануваат во ќорсокак околу тоа како да продолжат со следната фаза од планот на Трамп за Газа. Лидерите на палестинските фракции кои минатата недела одржаа разговори со медијатори во Каиро – Египет, Катар и Турција – ја нагласија потребата Израел „целосно и безусловно да ги почитува условите од договорот за прекин на огнот, во целост и без фрагментација“.
Хамас го обвинува недостигот од целосен договор за одбивањето на Израел да ги исполни обврските од првата фаза, која ги запре големите борби, но не ги прекина израелските напади. Израел тврди дека неговите напади имаат за цел да спречат непосредни напади од страна на Хамас и други милитанти.
Во израелските напади во Газа се убиени повеќе од 990 луѓе од прекинот на огнот, велат палестинските здравствени службеници, додека Израел вели дека милитантите убиле четири војници во истиот период.
Израел сè уште окупира повеќе од половина од Газа, каде што им нареди на жителите да се повлечат и ги сруши преостанатите структури.
Речиси целото население од повеќе од два милиони Палестинци сега живеат во тесен појас по должината на брегот, претежно во шатори и оштетени згради, под фактичка контрола на Хамас.
