Украинскиот претседател Володимир Зеленски потврди дека е договорено тридневно примирје со Русија во рамките на американските напори да се испреговара крај на војната што трае повеќе од четири години.
Зеленски на Телеграм исто така изјави дека двете страни ќе разменат 1.000 воени заробеници, додека хуманитарните прашања остануваат клучен украински приоритет.
„Затоа денеска, во рамките на преговарачкиот процес со посредство на американската страна, добивме руска согласност да се спроведе размена на воени заробеници во формат 1.000 за 1.000“, напиша Зеленски.
Исто така ќе биде во сила примирје „на 9, 10 и 11 мај“, додаде тој.
Агенцијата Франс прес објави дека Москва го потврдила тридневниот прекин на огнот и размената на заробеници со Киев.
„Потврдувам дека руската страна ја прифаќа иницијативата што ја предложи американскиот претседател Доналд Трамп во врска со прекин на огнот за размена на заробеници меѓу Русија и Украина“, им изјави на новинарите дипломатскиот советник на рускиот претседател Јуриј Ушаков.
Трамп нешто порано денеска на социјалните мрежи објави дека од 9 до 11 мај ќе биде во сила тридневно примирје во војната меѓу Русија и Украина.
„Се надевам дека ова е почеток на крајот на една многу долга, смртоносна и тешко водена војна“, рече тој, додавајќи дека во преговорите за завршување на судирот постојано се постигнува напредок.
