Планот беше презентиран вчера за време на посетата на украинскиот претседател Володимир Зеленски на Берлин, во време кога европските лидери се обидуваат да испратат силна порака до американскиот претседател Доналд Трамп за единството на континентот во поддршка на Украина, објави Ројтерс.
„Силна украинска одбранбена индустрија е од суштинско значење за одбраната од руска агресивна војна и е важен елемент на безбедносните гаранции за одвраќање на идна руска агресија“, стои во документот дистрибуиран за време на посетата на Зеленски, која следеше по продолжувањето на мировните преговори со американските претставници.
Според новиот план, Германија и Украина потесно ќе соработуваат во областите на одбранбените истражувања, заедничките инвестиции и набавките. Како најголем европски поддржувач на Украина, Германија, исто така, размислува за користење на федерални гаранции за поттикнување инвестиции во украинската одбранбена индустрија.
Планот исто така предвидува испитување на можноста за заедничка набавка на одбранбена опрема произведена во Украина, особено дронови-пресретнувачи, за заштита на воздушниот простор на НАТО, како дел од Европската иницијатива „Небесен штит“.
Со цел зајакнување на индустриските врски, во Берлин ќе се формира канцеларија за врски за украинската одбранбена индустрија наречена „Куќа на слободата на Украина“. Министерствата за одбрана на двете земји ќе одржуваат редовни консултации на високо ниво, а Германија ќе го зголеми присуството на своите воени аташеа во Киев и ќе ја интензивира размената на експерти.
Во документот исто така се наведува дека Германија и Украина ќе преземат сеопфатни мерки за спречување на корупцијата. Овој потег е одговор на загриженоста на Западот по најголемиот корупциски скандал во Киев за време на војната, што доведе до оставка на двајца министри и началникот на кабинетот на претседателот Зеленски.
