„Во вторникот француската морнарица го пресретна танкерот Деливер додека минуваше покрај брегот на Сицилија, кршејќи го поморското право“, напиша Макрон во објава на платформата Икс, заедно со видео на кое се гледаат командоси од воени хеликоптери како се спуштаат на палубата на бродот.
Макрон нагласи дека оваа акција јасно ја покажува решителноста на европските сојузници во уништувањето на руските нафтени канали, а е спроведена само неколку дена по слична, голема операција спроведена од Британија.
„Оваа најнова акција против сенишната флота ја илустрира решителноста на Европејците. Нема да дозволиме сенишната флота да ги избегне санкциите и да ги финансира руските воени напори. Европа е решена. Ќе продолжи со сите потребни напори за да ја зголеми цената на војната за Русија и да овозможи воспоставување силен и траен мир во Украина“, порача Макрон.
La Marine Nationale a arraisonné mardi le pétrolier Deliver alors qu’il transitait au large de la Sicile en infraction avec le droit de la mer.
Cette nouvelle action contre la flotte fantôme, conduite quelques jours après une opération similaire par le Royaume-Uni… pic.twitter.com/5Gjn43MhLr
— Emmanuel Macron (@EmmanuelMacron) June 25, 2026
Западните земји го засилија притисокот врз „сенишната флота“ – мрежа од танкери кои Русија ги користи за да го скрие потеклото на својата нафта и да продолжи да ја извезува и покрај западното ембарго.
Операцијата која ја спомна Макрон се случила на 14 јуни, кога британски специјални сили и агенти на Националната агенција за борба против криминалот извршиле рација на танкерот Смиртос во каналот Ламанш.
Тоа е прва таква операција предводена од Британија и била спроведена откако било утврдено дека танкерот влегол во британските територијални води без легитимно знаме. Имено, непосредно пред тоа, Камерун, под дипломатски притисок од Европската Унија, ги отстрани Смиртос и 35 други бродови од руската сенишна флота од својот регистар на бродови, оставајќи го танкерот технички без државјанство.
Бродот Смиртос, кој транспортирал повеќе од 100.000 тони руска сирова нафта од типот Урал од пристаништето Уст-Луга до Индија, е задржан од британските власти во пристаниште во близина на Вејмут. Индискиот капетан на бродот Аџај Пант е веднаш уапсен и официјално обвинет пред британскиот суд за директно кршење на санкциите против Русија, за што се соочува со казна затвор до 10 години.
Официјална Москва остро реагираше на овие постапки на западните морнарици, нарекувајќи го пресретнувањето и запленувањето на бродовите кршење на меѓународното право и „чин на меѓународно пиратство“.
