Според кривичната пријава на ФБИ Ченгсјуан Хан кинеска докторантка на Факултетот за биолошки науки и технологија на Универзитетот Хуаџонг во Вухан, била уапсена во неделата на аеродромот во Детроит.
Според пријавата, Хан испратила четири пратки со таен биолошки материјал од Кина од септември до членови на лабораторија на Универзитетот Мичиген, каде што планирала да помине една година на истражувачки проект. Властите тврдат дека Хан дала лажни изјави за содржината на пратките кога била испрашувана од федерални агенти по нејзиното пристигнување во САД од Шангај.
Минатата недела, двајца кинески државјани беа обвинети откако ФБИ утврди дека еден од нив се обидел да шверцува отровна габа во САД, исто така за истражување на Универзитетот во Мичиген. Едниот од нив, истражувач на универзитетот, беше уапсен и задржан во притвор, додека на другиот му беше одбиен влез во земјата минатата година и сè уште е на слобода.
Во пријавата се тврди дека материјалот што Хан наводно се обидела да го шверцува – понекогаш скриен меѓу страници на книга – е поврзан со тркалезни црви и бара посебна владина дозвола за увоз во Соединетите Држави.
Во пријавата исто така се тврди дека Хан избришала содржина од своите електронски уреди три дена пред да пристигне во Детроит. „Хан изјави дека го направила тоа за да „почне одново“ за време на својот престој во Соединетите Држави“, се вели во документот.
Хан моментално е во притвор и чека сослушување за кауција закажано за среда. Кинеската амбасада во Вашингтон не одговори веднаш на барањето за коментар по работното време.
Во врска со претходно обвинетите кинески државјани, портпарол на кинеското Министерство за надворешни работи минатата недела изјави дека не е запознаен со ситуацијата, но додаде дека кинеската влада „секогаш бара од своите граѓани во странство строго да се придржуваат до локалните закони и прописи, заштитувајќи ги своите легитимни права и интереси во согласност со законот“.
Во соопштението објавено минатата недела, универзитетот соопшти дека соработува со федералните власти и остро ги осудува „сите дејствија што имаат за цел да предизвикаат штета, да ја загрозат националната безбедност или да ја поткопаат основната јавна мисија на универзитетот“.
