Иницијативата доби на интензитет откако тројца пратеници на германската ЦДУ во Европскиот парламент – Петер Лизе (60), Јенс Гизеке (54) и Норберт Линс (48) – кои долго време се залагаат за Е20, примиле писмо од претседателката на Комисијата.
Во писмото, во кое имал увид германскиот весник Билд, Урсула фон дер Лаен наведува: „Според важечките прописи, максималниот дозволен процент на етанол во бензинот е 10 проценти (Е10). Комисијата ја признава улогата која можат да ја играат повисоките удели на биогорива во декарбонизацијата на постојниот возен парк. Како дел од ревизијата на законската рамка за горива, Комисијата ќе разгледа одобрување на повисоки удели на етанол (Е20). Притоа, ќе ги земе предвид особено можните проблеми поврзани со компатибилноста на моторите на постојните возила со ова гориво, како и потребата од поттикнување инвестиции во напредни биогорива“.
Оваа најава во пратеничкиот клуб на Европската народна партија (ЕПП) била поздравена како голем чекор напред. Досега, ова еколошко гориво беше достапно само на неколку бензински пумпи во Германија, но сега може да се воведе низ цела Европска Унија.
„Биогоривата го прават горивото поевтино. Ефектот е моментален и не бара нова инфраструктура. Ова е конкретен придонес кон заштитата на климата што директно влијае на милиони Европејци“, вели за Билд експертот за климатска политика Петер Лизе. Неговиот колега Јенс Гизеке, портпарол на ЕНП за транспортна политика, додава: „Одржливите биогорива се неопходна алатка за брза и општествено прифатлива декарбонизација на транспортниот сектор. За автомобилската индустрија и потрошувачите, E20 е решение кое веќе функционира денес. Производители како БМВ, Фолксваген и Мерцедес веќе ја одобрија употребата на E20 за поновите мотори“.
Норберт Линс, заменик-претседател на Комитетот за земјоделство, исто така ја нагласи економската корист: „Домашниот биоетанол создава додадена вредност во руралните средини и ја зајакнува европската безбедност на снабдувањето“.
Енергетската криза поттикна и дискусии за подобро искористување на биогоривата не само за бензинот, туку и за дизелот. Маслото од репка доаѓа во фокусот како алтернативно и домашно гориво. Според експертите цитирани од Франкфуртер алгемајне цајтунг, горивото од репка е многу блиску до дизелот во однос на квалитетот. Иако има малку пониска енергетска вредност на литар, поради поголемата густина се смета за речиси исто толку вредно. Експертите забележуваат и дека дизел моторите, во принцип, можат да користат и растително масло како гориво.
E20 е бензинско гориво кое содржи до 20 проценти биоетанол (алкохол произведен од обновливи извори како што се пченка, шеќерна репка, пченица или отпадна биомаса).
Моменталниот стандард на европските пумпи се горивата E5 (до 5 проценти етанол во класичен еуросупер 95) и E10 (до 10 проценти етанол). Со удвојување на процентот на етанол во споредба со E10, планот е да се намали потрошувачката на фосилни горива и да се намалат емисиите на јаглерод диоксид за приближно 15 проценти во споредба со чистиот бензин.
На ниво на Европската Унија, E20 сè уште не е во широка комерцијална употреба на јавните пумпи бидејќи моменталните прописи го ограничуваат процентот на етанол на 10 проценти. Сепак, тестирањето веќе започна:
– Германија: На крајот на 2023 година, во Манхајм беше отворена првата тест бензинска пумпа со гориво E20, првенствено наменета за возила од возен парк на различни компании со цел да се тестира горивото во секојдневната пракса.
– Остатокот од светот: Надвор од Европа, E20 воопшто не е нов. Земји како Бразил (каде што стандардот е често E27 и повисок) и Тајланд со години масовно користат мешавини од биоетанол со висока содржина во секојдневниот сообраќај.
Точниот износ на заштеда во центи по литар сè уште не е дефиниран, со оглед на тоа што горивото сè уште не е стандардизирано и не добило официјално одобрение од ЕУ. Сепак, се очекува да биде значително поевтино од конвенционалниот бензин од две причини:
– Цената на суровината: Производството на биоетанол е попрофитабилно на долг рок и помалку подложно на геополитички кризи од увозот на сирова нафта.
– Даночни олеснувања: Се очекува земјите-членки на ЕУ да применат пониски акцизи за горивата со повисока еколошка компонента за да ги охрабрат возачите да ги користат.
Биоетанолот има нешто пониска енергетска вредност од чистиот бензин. Експертите проценуваат дека употребата на гориво E20 би можела да ја зголеми потрошувачката на автомобилот за околу 3 проценти. И покрај ова, пониската цена по литар на пумпата на крајот треба да обезбеди финансиски заштеди за возачите.
Воведувањето на ова гориво не бара никаква нова инфраструктура на бензинските пумпи, но се поставува прашањето за издржливоста на моторот: Производителите како што се Фолксваген, БМВ и Мерцедес веќе потврдија дека нивните понови мотори се целосно компатибилни со горивото Е20 и немале никакви проблеми.
Поголемиот дел од алкохолот може да биде агресивен кон гумените делови, цревата и пластичните делови во системот за довод на гориво кај постарите автомобили. Доколку E20 стане стандард, возачите на постари модели веројатно ќе мора да се држат до горивото E5 или E10.
