Имено, шеикот Мохамед бин Зајед, попознат како МБЗ, контактирал со регионалните лидери набрзо откако САД и Израел го нападнаа Иран на 28 февруари. Повикувајќи се на извори запознаени со разговорите, Блумберг наведува дека МБЗ верувал дека земјите од Заливот мора колективно да возвратат за да го одвратат Иран.
Техеран како одговор на нападите лансираше стотици беспилотни летала и ракети кон земјите низ Заливот, таргетирајќи американски воени цели како пристаништа, аеродроми, хотели, станбени високи згради и енергетски објекти, и го затвори Ормускиот теснец, прекинувајќи го извозот на нафта и гас.
Како што наведува Блумберг, саудискиот престолонаследник Мохамед бин Салман и други лидери од Заливот му рекле на МБЗ дека конфликтот „не е нивна војна“. Отфрлањето наводно го фрустрирало Абу Даби и дополнително ги влошило веќе затегнатите односи меѓу ОАЕ и Саудиска Арабија.
За време на разговорот, МБЗ наводно ги потсетил своите колеги дека Советот за соработка во Заливот (ГЦЦ) првично бил основан во 1981 година, делумно поради стравувањата поврзани со Исламската револуција на Иран. И покрај напорите на ОАЕ, Катар, Бахреин, Кувајт, Оман и Саудиска Арабија на крајот се воздржале од приклучување кон координираната воена акција против Иран.
Катар наводно размислувал за одмазда по иранскиот напад во март, во кој беше оштетен објектот за течен природен гас Рас Лафан, но подоцна одлучил да се фокусира на напорите за смирување на тензиите. На крајот на април, ОАЕ ја објави својата одлука да се повлече од нафтените картели ОПЕК и ОПЕК+.
Откако не успеал да ги убеди своите сојузници од Заливот, ОАЕ независно извршија ограничени напади врз Иран и ја продлабочија безбедносната соработка со Израел, објави Блумберг. Според извештајот, соработката вклучувала споделување разузнавачки информации, системи за рано предупредување и пресретнување ракети за време на конфликтот.
ОАЕ беа најчеста цел на ирански напади, при што Техеран лансираше речиси 3.000 беспилотни летала и ракети кон земјата пред да се постигне прекин на огнот во април. Администрацијата на американскиот претседател Доналд Трамп ги поддржа напорите за создавање заеднички одговор во Заливот, но Саудиска Арабија и Катар наместо тоа инсистираа на дипломатско решение и медијација.
Извештајот доаѓа еден ден откако Иран ги обвини ОАЕ дека ја поддржуваат војната која САД и Израел ја водат против Техеран. Зборувајќи на самитот на БРИКС во Индија во четвртокот, иранскиот министер за надворешни работи Абас Арагчи ги нарече ОАЕ „активен учесник во оваа агресија“, објави Франс прес.
Во вторникот Волстрит џурнал објави дека ОАЕ тајно извршиле воени напади врз Иран, вклучително и напад врз голема иранска рафинерија за нафта, што означува значителна ескалација на улогата на ОАЕ во конфликтот.
Претседателот на САД Доналд Трамп изјави дека кревкото примирје меѓу САД и Иран сè уште трае, но „едвај се држи“, додека остро го критикуваше најновиот мировен предлог на Техеран, кој го нарече „целосно неприфатлив“.
Тензиите меѓу Иран и земјите од Заливот нагло се зголемија откако почна агресијата на 28 февруари. Техеран постојано ги обвинува земјите од Заливот дека им помагаат на американските операции, додека владите на тие земји негираат дека дозволуваат нивната територија или воздушен простор да се користи за напади врз Иран.
