„Црвено-црните“ подобро го отворија натпреварот и во најголем дел од првото полувреме ја контролираа играта одржувајќи предност од неколку гола. Охрид во финишот се врати резултатски, но вардарци сепак на пауза заминаа со минимална позитива од 13-12.
Вториот дел донесе пресврт, откако охриѓани ја искористија кризата на ривалот и стигнаа до водство кое на моменти беше и три гола. Сепак, искуството на Вардар дојде до израз кога беше најпотребно, па тимот од Скопје се врати во игра и израмни во клучните моменти.
Во неизвесната завршница се играше гол за гол, а Вардар успеа да ја сочува минималната предност и да го одбрани налетот на Охрид, кој имаше шанса за израмнување во последните секунди, но не ја искористи. Конечниот резултат гласеше 24-23 за црвено-црните.
Најзаслужен за победата беше Јака Малус со осум гола, додека Хориха додаде шест. Кај Охрид, по пет реализации запишаа Дарко Ѓукиќ и Косуке Јасухира.
