Сајенс Фокус наведе некои од најчудните работи што некогаш биле украдени.
Бело злато
Во 2022 година, крадци украле 60 контејнери со семена течност од бикови од фарма во Олфен, Германија.
Можеби звучи како необична кражба, но биковската семена течност е исклучително вредна затоа што се користи за вештачко оплодување на крави. Во Велика Британија, 75 проценти од одгледувањето на млечни крави се врши на овој начин.
Понекогаш нарекувано „бело злато“, семето од бикови може да се продава за десетици илјади фунти по милилитар. Крадците морале да бидат добро подготвени, бидејќи мора да се чува на екстремно ниски температури во течен азот на -196 степени за да не се расипе.
Влекачи и инсекти
Леопардовите гекони доаѓаат во различни бои и шари, од бели до светло портокалови, со точки или ленти.
Во 2018 година биле украдени 7.000 живи животни од Инсектариумот и павилјонот на пеперутки во Филаделфија, Пенсилванија.
Меѓу пленот имало светлечки лебарки, тарантули и леопардови гекони, со вкупна проценета вредност од 50.000 долари. Но крадците можеби не биле мотивирани само од пари.
Важна трага оставена на местото на злосторството биле униформите на вработените закачени на ѕид со ножеви. Тоа го навело директорот на музејот да заклучи дека осомничените се незадоволни работници од одделот за грижа за животните, но сторителите никогаш не биле фатени.
Стари рендгенски снимки
Во 2013 година, двајца крадци биле фатени како крадат 15.000 рендгенски снимки од болница во Детроит.
Украдените снимки потекнувале од периодот пред 2005 година, кога болницата преминала на дигитален систем. Рендгенскиот филм содржи кристали од сребрен бромид, кои при развивање се претвораат во атоми на сребро и овозможуваат видлива слика.
Токму содржината на сребро веројатно ги привлекла крадците, но можеби не знаеле дека процесот на негово издвојување е исклучително скап.
Патнички авион
Кражбата на авионот „Боинг 727-223“ во 2003 година предизвика глобална потрага и подигна тревога меѓу американските разузнавачки служби. Авионот бил украден од аеродромот „Кватро де Февреиро“ во Ангола од американски инженер за летање и механичар од Република Конго.
Без комуникација со контролата на летање, авионот полетал со исклучени светла и транспондер и се упатил кон Атлантскиот Океан. Крадците никогаш повеќе не биле видени, а авионот ниту негови делови никогаш не биле пронајдени.
Мотивот никогаш не бил дефинитивно утврден, но властите веруваат дека можеби станува збор за сложена измама со осигурување.
Кошници за пчели
Стотици кошници биле украдени од еден пчелар во Калифорнија во 2017 година. Медоносните пчели се вредни поради опрашувањето, кое е клучно за успешното производство на бадеми во таа американска држава.
Главниот осомничен бил пронајден со 2.500 украдени кошници од фарми низ целата држава, чија вредност била проценета на 875.000 долари.
Пчеларите често ја обележуваат својата опрема со уникатни ознаки, што им помогнало на властите да го идентификуваат украдениот плен.
Златен тоалет
Целосно функционален тоалет од чисто злато, вреден 4,8 милиони фунти и тежок 98 килограми, бил украден од палатата Бленхајм во 2019 година.
Тоалетот бил поврзан со инсталациите како дел од изложбата на италијанскиот уметник Маурицио Кателан и бил изложен под насловот „Америка“.
Но, во раните утрински часови на 14 септември, петмина мажи упаднале во палатата, го откорнале тоалетот и избегале со украден автомобил Фолксваген голф. Тројца мажи подоцна беа осудени за ова злосторство.
