Фестивалот ќе биде отворен со филмот „Електричниот бакнеж“, француска комедија чие дејство се одвива во минатото, додека почесната Златна палма ќе му биде врачена на режисерот на „Господарот на прстените“ Питер Џексон. Церемонијата на затворање е закажана за 23 мај, кога ќе биде доделена Златната палма, најважната награда на фестивалот и една од најпрестижните награди во филмската индустрија.
Овогодинешното издание привлекува внимание и поради послабото присуство на големи холивудски студија. За разлика од претходните години, кога наслови како „Топ Ган: Маверик“ и „Елвис“ пристигнуваа во Кан, оваа година ваквите филмови најчесто се изоставени поради можен слаб прием или високите трошоци за доведување големи ѕвезди на Азурниот брег.
Уметничкиот директор на фестивалот, Тиери Фремо, изјави за новинарите дека Холивуд се преобликува со предложеното преземање на „Ворнер Брос. Дискавери“ од страна на „Парамаунт Скајденс“.
Во центарот на вниманието сè уште ќе бидат авторските филмови и режисери како Педро Алмодовар, Џејмс Греј, На Хонг-џин, Павел Павликовски и Рјусуке Хамагучи, кои носат нови дела во Кан.
Фестивалот во последните години се засили како важна станица за филмовите што подоцна влегуваат во трката за Оскар, а дистрибутерот „Неон“ стои зад последните шест добитници на Златна палма и оваа година учествува со повеќе од една четвртина од 22-та филма во натпреварувачката програма.
Наградите ќе ги одреди деветчлено жири предводено од јужнокорејскиот режисер Парк Чан-вук, а во кое ќе бидат и Деми Мур, Клое Жао и Стелан Скарсгард. Иако нема многу големи холивудски филмови на програмата на фестивалот, во текот на следните две недели се очекуваат Кристен Стјуарт, Барбра Стрејсенд, Адам Драјвер, Хавиер Бардем, Мајкл Фасбендер, Кејт Бланшет, Рами Малек, Себастијан Стен и Сандра Хулер.
