Отстранети се диви депонии на улиците Перо Наков во општината Гази Баба, Џон Кенеди во општината Чаир, како и Гвадалахара во општината Шуто Оризари.
Еко-патролата на ЈП Комунална хигиена-Скопје минатата недела изготви 19 записници за лица и правни субјекти затекнати при кршење на Законот за јавна чистота, од кои по шест записници се врачени на територијата на скопските општини Чаир и Карпош.
ЈП Комунална хигиена-Скопје изврши и целосно расчистување на теренот по обемната сообраќајна незгода лоцирана на главната улица во општината Ѓорче Петров, како и чистење и посипување со песок во непосредна близина на маркетот Томи во општината Кисела Вода, каде што беше забележано излевање на поголемо количество масло на коловозот.
Од претпријатието апелираат да престане масовното одлагање отпад на јавни и сообраќајни површини, што директно ја загадува животната средина и го загрозува јавното здравје. Апелираат мешаниот комунален отпад да се одлага исклучиво во наменски поставените садови, додека претпријатието продолжува на граѓаните да им ја нуди можноста својот кабаст отпад бесплатно да го одложат во Центарот за селекција на отпадот во Карпош, секој ден во неделата, од 07 до 19 часот.
