Според најавите, контролите ќе се одвиваат во текот на целата недела, при што сообраќајната полиција ќе биде присутна на клучни патни правци, градски улици и регионални патишта, со посебен фокус на делниците каде што претходно се регистрирани зголемен број прекршоци и сообраќајни незгоди.
Од МВР наведуваат дека акцијата е дел од поширока европска иницијатива во која учествуваат сите членки на мрежата ROADPOL, со цел да се влијае врз свеста на возачите и да се намали бројот на сообраќајни несреќи предизвикани од неприлагодена брзина.
Во рамки на контролите ќе се користат радарски уреди, патроли и мобилни екипи, а посебен акцент ќе биде ставен и на превентивниот карактер на акцијата, при што дел од локациите за мерење брзина се однапред објавени за возачите.
„Апелираме до сите учесници во сообраќајот да ги почитуваат ограничувањата на брзината и сообраќајните правила, нагласувајќи дека целта на засилените контроли не е казнување, туку зголемување на безбедноста и заштита на животите на патиштата“, соопшти МВР.
