Трамп призна дека лично побарал од ФИФА да го разгледа црвениот картон на Балогун, оценувајќи дека исклучувањето било неправедно.
„Побарав да се направи ревизија затоа што не мислев дека тоа беше прекршок. Сите сакаат да гледаат натпревар со најдобрите фудбалери. Како би се чувствувале ако ги тргневме Меси, Роналдо или Хари Кејн?“, изјави Трамп.
По неговата изјава, со официјално соопштение се огласи и претседателот на ФИФА, Џани Инфантино, кој потврди дека разговарал со американскиот претседател, но нагласи дека немал никакво влијание врз конечната одлука. Инфантино истакна дека независната Дисциплинска комисија на ФИФА работи автономно и одлучува исклучиво врз основа на правилата и фактите.
„Ги видов јавните коментари во врска со одлуката на независната Дисциплинска комисија на ФИФА поврзана со суспензијата на Фоларин Балогун и би сакал да повторам еден основен принцип на управувањето на ФИФА.
Судските тела на ФИФА се независни. Тие работат автономно, го применуваат Дисциплинскиот правилник на ФИФА и одлучуваат за случаите врз основа на важечките прописи и конкретните факти. Нивната независност е од суштинско значење за кредибилитетот и интегритетот на фудбалот и тоа секогаш мора да се почитува.
Да, редовно разговарам со претседателот на Соединетите Американски Држави за прашања поврзани со Светското првенство на ФИФА. Во овој случај добив повик од претседателот Доналд Трамп, исто како што добивам повици од шефови на држави, владини претставници, луѓе од фудбалот и бизнис лидери од целиот свет за различни прашања. За време на разговорот му објаснив дека во тек е правна постапка пред независните судски тела на ФИФА и дека случајот ќе биде решен во догледно време од надлежните органи. Така функционира системот на ФИФА и тоа е принцип што секогаш ќе го почитувам.
Ги читам одлуките на Дисциплинската комисија на ФИФА кога ќе бидат објавени. Понекогаш сум изненаден од нив. Понекогаш се согласувам со нив, а понекогаш не. Но, она што секогаш го правам е да ги почитувам тие одлуки и автономијата на телата што ги носат. Дали лично ни се допаѓа некоја одлука или не е неважно. Почитувањето на независните институции и владеењето на правото е она што во секој момент го штити интегритетот на нашите натпреварувања и кредибилитетот на ФИФА“, стои во обраќањето на Инфантино.
