Во рамки на посетата, генералот Лафчиски остварил средба со претседателот на Република Албанија, Бајрам Бегај, на која било разговарано за безбедносната состојба во регионот, сојузничката соработка и заедничките предизвици во современото безбедносно опкружување.
„Притоа беше истакната и континуирано добрата билатерална соработка помеѓу Армијата и Вооружените сили на Република Албанија, особено во областа на заедничката обука, вежбите и учеството во регионални и НАТО активности, што претставува значаен придонес за регионалната и колективната безбедност“, се наведува во соопштението.
По приемот со високи воени почести во Генералштабот на Вооружените сили и Министерството за одбрана на Албанија, генералот Лафчиски имал одвоени средби со својот домаќин, началникот на Генералштабот на албанските вооружени сили, генерал-потполковник Арбен Кинџи и со министерот за одбрана, Ермал Нуфи.
„На средбата помеѓу началниците на Генералштабовите беа опфатени повеќе прашања меѓу кои унапредување на воената соработка преку реализација на заеднички активности, обуки и вежби, учество во меѓународни операции, актуелните безбедносни предизвици, како и можностите за користење на капацитетите со кои располагаат двете армии и меѓусебната соработка при справување со кризи“, се наведува во соопштението.
Меѓусебната воена соработка и нејзиното унапредување, како значаен фактор за регионалната и колективната безбедност, биле тема на разговор и на средбата на генералот Лафчиски со министерот за одбрана, Ермал Нуфи.
За време на разговорите била истакната важноста на соработката помеѓу двете армии во зацврстување на стабилноста и безбедноста во регионот, како и придонесот во рамки на НАТО. Притоа беше потврдена заедничката заложба за континуирано унапредување на билатералната воена соработка.
Армиската делегација го посетила и Полкот за специјални операции на Вооружените сили на Албанија, каде била запознаена со мисијата, задачите и способностите на единицата, а била реализирана и демонстрација на дел од нивните оперативни капацитети.
„Армијата има развиено добра билатерална соработка со вооружените сили на Република Албанија која е најизразена на полето на военото образование, обуката и вежбите, како на билатерален план, така и во рамките на Јадранската повелба, Форумот на началници на Генералштабови на армиите од балканските земји и СЕДМ процесот. Посетата претставува одлична можност за унапредување на соработката помеѓу двете армии“, се наведува во соопштението на Канцеларијата за воени односи со јавноста на Генералштабот на АРМ.
