„Во Албанија само поддршка дајте ни, никој не може да нѐ промени од светото македонско име. Се обидоа на секаков начин. Македонците од Гора, Голо Брдо и низ сите градови во Албанија ќе останат Македонци“, рече Митревски.
Александар Јаневски, претседателот на Сојузот на здруженијата на Македонците и децата бегалци од Егејскиот дел на Македонија МАКЕДОН, на собирот рече дека договорот Заев-Борисов од 1 август 2017 година и спогодбата Димитров-Коѕиас од 17 јуни 2018 година се продолжение на Букурешкиот договор од 10 август 1913 година.
„Со нив се легализира окупацијата врз Македонија и геноцидот врз македонскиот народ кој продолжува и денес. Бараме безусловно еднострано раскинување на договорите со Атина и Софија и безусловно еднострано распуштање на комисиите со Грција и Бугарија за ревизија на македонската историја. Бараме Софија и Атина да ги признаат Македонците, македонскиот јазик и државата Македонија. Ја отфрламе француско-бугарската преговарачка рамка од 30 јуни 2022 година за членство на Македонија во Европската Унија, го отфрламе Протоколот од 17 јули 2022 година за спроведување на Договорот Заев-Борисов од 1 август 2017 година. Остануваме со барањето до Генералното собрание на Обединетите Нации да ја продолжи почнатата, а незавршена расправа од 1948 година, со донесување на Резолуција за децата Македонци бегалци од Граѓанската војна во Грција“, рече Јаневски.
