Во своето обраќање, министерката Божиновска нагласи дека земјата влегува во нова фаза на енергетско позиционирање
„Денес, ние свесно се позиционираме како регионален енергетски јазол што ги поврзува пазарите, изворите и партнерите“, потенцираше Божиновска.
Таа ја претстави стратегијата базирана на три клучни столба.
„Интерконекторот со Грција, како директен пристап до алтернативни извори на гас и ЛНГ-терминали; соработката со Србија, која отвора северен коридор и овозможува двонасочен проток; партнерството со САД преку ЛНГ- иницијативата, со што се зајакнува енергетската независност. Енергетската политика без инфраструктура останува само декларација. Со изградбата на овие коридори ја намалуваме ранливоста, создаваме поконкурентни цени и се позиционираме како транзитна земја што додава вредност“, истакна македонската министерка на форумот.
Министерката потенцираше дека новата улога на земјата не е само транзитна, туку стабилизирачка за поширокиот регион.
„Не сакаме да бидеме периферен пазар – туку сигурен партнер во европската енергетска мрежа“, нагласи Божиновска
Во однос на енергетската транзиција, Божиновска истакна дека пристапот на државата е прагматичен и насочен кон сигурност.
„Нема енергетска транзиција без сигурност – и нема сигурност без диверзификација. Географијата сама по себе не е предност ако не се претвори во политика. Нашата цел е да станеме фактор на стабилност на регионалниот пазар на електрична енергија. Со зајакнувањето на јужните и северните енергетски коридори, Македонија се позиционира како активен учесник во стабилизирањето на енергетските текови во регионот“, порача министерката Божиновска
Клучната порака која Сања Божиновска ја испрати од Делфи е јасна: Градиме енергетски систем кој е диверзифициран, поврзан и стратешки релевантен – со улога што ќе го дефинира нашето место во Европа во децениите што следат.
