Високиот национален претставник во Комитетот за градење отпорност при НАТО, Стојанче Ангелов, вчера учествуваше на годишниот состанок во седиштето на Алијансата во Брисел.
На средбата, како што информираат од Дирекцијата за заштита и спасување, се дискутирало за инвестициите на сојузниците во отпорноста, цивилната подготвеност и исполнувањето на обврската од Самитот во Хаг – издвојување пет отсто од националниот БДП за одбраната.
„Определбата за зајакната цивилно-воена соработка беше повторно демонстрирана преку заедничката сесија меѓу претставниците за отпорност и националните директори за логистика, одржана за првпат во овој формат и на ова ниво. Концептот за поддршка на земја-домаќин е невозможен без координирана цивилно-воена соработка и заедничко планирање, коишто се клучни за ефикасно спроведување на одбранбените планови на НАТО“, се наведува во соопштението.
Состаноците на Комитет за градење отпорност на ниво на високи национални претставници се одржуваат еднаш годишно и претставуваат централна платформа за креирање на политиките на Алијансата со цивилен предзнак.
Цивилната подготвеност и цивилното одбранбено планирање се дел од пошироките напори за јакнење на колективната отпорност на Алијансата и концептот за одвраќање и одбрана на НАТО.
