Крвниот притисок и понатаму опасно ѝ варира, а лекувањето е ограничено на обиди да се стабилизира нејзината состојба со терапија со кислород, соопшти Фондацијата „Наргес Мохамади“.
Во петокот, таа беше префрлена од затвор во болница во северозападниот град Занџан по „катастрофално влошување“ на нејзиното здравје, при што двапати ја изгуби свеста и доживеа тежок срцев удар, објави фондацијата.
Мохамади, која има педесетина години, ја освои Нобеловата награда за мир додека беше во затвор поради кампањата за промовирање на женските права и укинување на смртната казна во Иран. Кон крајот на март, како што се претпоставува, претрпе срцев удар, соопшти нејзиното семејство.
Мохамади беше осудена на нова затворска казна од седум и пол години, објави фондацијата во февруари, неколку недели пред САД и Израел да започнат војна против Иран. Комитетот за Нобелова награда го повика Техеран веднаш да ја ослободи.
Фондацијата во февруари соопшти дека Мохамади е уапсена во декември откако ја осудила смртта на адвокатот Хосров Аликорди. Обвинителот Хасан Хематифар им изјави на новинарите тогаш дека таа изнела провокативни коментари на комеморацијата на Аликорди.
