Сејшелите, Маврициус и Мадагаскар ги повлекоа дозволите за прелетување по „интензивниот притисок“ од Кина, изјави тајвански функционер. Кина го негираше притисокот, но ги пофали трите земји од Индискиот Океан, велејќи дека „високо ги цени“.
Ова е првиот јавно познат случај тајвански лидер да мора да откаже патување во странство поради одбиени дозволи за прелетување. Есватини, порано познат како Свазиленд, е единствениот дипломатски сојузник на Тајван во Африка. Земјата е една од само 12 земји, претежно помали во Латинска Америка и Пацификот, кои го признаваат Тајван, пишува Би-би-си.
Кина се придржува до принципот „една Кина“, според кој Пекинг тврди дека има право на суверенитетот над Тајван, иако многумина во Тајван се сметаат себеси за припадници на суверена држава. Пекинг го смета самоуправниот остров за одметната покраина која на крајот ќе се обедини со Кина и не ја исклучи употребата на сила за да го постигне ова.
Кинеските власти претходно отворено го критикуваа Лаи, нарекувајќи го „проблематичен актер“ и „уништувач на мирот преку Тајванскиот теснец“.
Во објава на платформата Икс, Лаи ги осуди „принудните потези“ на Кина, велејќи дека тие „ги разоткриваат ризиците што авторитарните режими ги претставуваат за меѓународниот поредок“. „Ниту една закана или принуда нема да ја поколеба решителноста на Тајван да соработува со светот“, рече тој.
Владата на Есватини изрази жалење што Лаи не може да патува, но рече дека тоа нема да „го промени статусот на долгогодишните билатерални односи“ со Тајван. Лаи требаше да учествува на прославата на 40-годишнината од доаѓањето на власт на кралот Мсвати III.
Портпаролот на Канцеларијата за тајвански работи при Државниот совет на Кина изјави на прес-конференција дека Пекинг „ја цени позицијата и потезите на релевантните земји во зачувувањето на принципот на една Кина“.
Кинеското министерство за надворешни работи исто така изјави дека е „јасно дека таканаречениот „претседател на Република Кина“ повеќе не постои во светот“, осврнувајќи се на официјалната титула на Лаи во Тајван.
Според Ројтерс, Сејшелите и Мадагаскар изјавија дека ја донеле одлуката затоа што не го признаваат Тајван.
Некои американски политичари ги критикуваа трите земји, а мнозинството во Комитетот за надворешни работи на Претставничкиот дом преку платформата Икс порачаа дека „стојат со Тајван против оваа отворена принуда“. Американскиот сенатор Тед Круз, исто така, го критикуваше Маврициус, велејќи дека се чини дека е „решен да застане на страната на Кинеската комунистичка партија“.
