„Нашите последни војници го напуштија Авганистан вечерва по скоро 20 години и се на пат кон дома“, рече германската министерка за одбрана Анегрет Крамп-Каренбауер.
„Ова е крај на историско поглавје, интензивна мисија која го тестираше Бундесверот и во која Бундесверот се докажа во борба“.
Германската војска ги водеше своите први копнени битки во Авганистан од крајот на Втората светска војна.
Американскиот претседател Џо Бајден и НАТО во средината на април објавија дека ќе повлечат околу 10.000 странски војници од Авганистан до 11 септември, 20-годишнината од нападот на Светскиот трговски центар во Њујорк, што беше и причина за мисијата.
Германија го имаше вториот по големина контингент војници во Авганистан по САД. Во последните две децении распореди околу 150.000 војници, а многу од нив служеле повеќе од една мисија.
59 германски војници загинаа во Авганистан.
