Белгиските здравствени власти, кои учествуваа во набавката на оваа вакцина за своите граѓани, наведуваат дека одобрението на Европската агенција за лекови за користење на американската „Новавакс” се очекува до крајот на годинава.
Се додава дека станува збор за протеинска вакцина што дејствува на поинаков начин од вакцините на „Фајзер” и на „Модерна” и дека се очекува дека „малиот број на тие што имале алергиски реакции на иРНК-вакцините нема лошо да реагираат на ‘Новавакс’ како можна дополнителна доза”.
Во Белгија, во која се вакцинирани 86 проценти од возрасната популација, односно околу 8,5 милиони луѓе, наведуваат дека алергиска реакција на иРНК-вакцините се појавила кај помалку од 1.000 луѓе.
Клиничките испитувања покажуваат дека ефикасноста на „Новавакс” во заштитата од зараза со коронавирусот е околу 90 проценти една недела по втората доза, но и дека е нешто пониска, до 60 проценти, кога станува збор за бета-сојот.
