Вчера вечерта, Чајна Дејли, весник на владејачката кинеска комунистичка партија (ККП) на англиски јазик, објави уреднички коментар во кој за честите тврдења на Трамп дека САД биле „искористувани“ се вели дека се „измама на американската јавност“.
„Никој не ги искористува САД“, се вели во текстот. „Проблемот е што САД со децении живеат над своите можности. Трошат повеќе отколку што произведуваат. Го експроприраа своето производство и позајмуваа за да имаат повисок животен стандард отколку што заслужуваат според продуктивноста. Наместо да бидат „измамени“, САД бесплатно уживаа да се возат во возот на глобализацијата“.
„САД треба да престанат да плачат дека се жртва во глобалната трговија и да ги прекинат своите каприциозни и деструктивни дејства“, додаваат тие.
ККП одби да попушти пред барањата на Трамп за преговори за новите трговски услови. Пекинг денеска најави замена на својот меѓународен трговски преговарач.
Ли Ченганг ја презема улогата – и онаа на заменик-министерот за трговија – што претходно ја вршеше долгогодишниот трговски цар Ванг Шоувен. Не беше наведена причината за промената, но Ли сега ќе ги води сите разговори со САД за решавање на трговската војна, која доаѓа во време на пошироко престројување во кинеската влада.
Во изјавата што ја прочита портпаролката на Белата куќа, Каролина Левит, Трамп вчера рече дека „топката е на теренот на Кина“.
„Кина мора да се договори со нас. Ние не мораме со нив“, се вели во соопштението. „Нема разлика меѓу Кина и која било друга земја освен што тие се многу поголеми“.
Денеска кинеското Министерство за надворешни работи возврати, наведувајќи дека САД ја започнаа трговската војна и дека Пекинг јасно ставил до знаење дека не сака да се бори, но и дека не се плаши.
„Ако САД навистина сакаат да го решат проблемот преку дијалог и преговори, треба да прекинат со екстремниот притисок, заканите и уцените и да разговараат со Кина врз основа на еднаквост, почит и взаемна корист“, рече портпаролот на Министерството за надворешни работи Лин Џијан.
Аналитичарите и официјалните лица очекуваат трговската војна да има значително влијание врз двете економии – Кина веќе се бореше да закрепне од пандемијата поради ниската потрошувачка и високата невработеност кај младите.
Во средата, Пекинг објави подобри од очекуваните економски резултати, најмногу благодарение на извозниците кои забрзаа да ги донесат производите во САД пред да стапат на сила тарифите.
Кинеското Национално биро за статистика објави дека економијата пораснала за 5,4% во првиот квартал, над очекувањата на аналитичарите. Сепак, високиот службеник на бирото Шенг Лаијун предупреди дека американските царини „ќе создадат одредени притисоци врз надворешната трговија и економијата на нашата земја“.
Кинескиот претседател Си Џинпинг е на турнеја низ азиските земји, патување кое, иако беше планирано пред трговската војна, дополнително ги зајакна јавните и приватните напори на Кина за зајакнување на трговските односи со другите земји.
