По враќањето во Тампа, Флорида, Хегсет одржа прес-конференција доцна попладне каде што потврди дека САД ќе продолжат со нови воздушни напади врз Иран. За време на брифингот, ултрадесничарската инфлуенсерка Лаура Лумер му постави прашање.
„Со оглед на тоа што Халид Шеик Мухамед детално призна дека ги организирал нападите на 11 септември и други заговори на Ал Каеда, зошто американската влада одлучи да го држи него и другите исламски џихадисти живи и удобно сместени во Гитмо со децении, наместо да ги егзекутира и да им донесе правда на 3.000 жртви од 11 септември?“, праша 33-годишната Лумер.
Hegseth: “These Gitmo detainees should have been executed in my mind personally a long time ago” pic.twitter.com/PUpdskqIfN
— Aaron Rupar (@atrupar) June 10, 2026
Хегсет го прифати нејзиниот аргумент и се согласи со нејзиниот став.
„Го ценам прашањето. Слушајте, пишував опширно за ова. Моето лично мислење е дека овие затвореници во Гитмо требаше да бидат погубени одамна за злосторствата што ги извршија против американскиот народ“, одговори шефот на Пентагон.
„За жал, запчаниците на американскиот правосуден систем целосно откажаа и сè е заглавено уште од времето кога работев таму како чувар. Продолжуваме да инсистираме на смртна казна, во овој случај и во сите други“, продолжи Хегсет.
Во притворниот логор во Гвантанамо моментално се наоѓаат 15 затвореници, од кои петмина се обвинети за планирање на терористичките напади од 11 септември 2001 година. Шеикот Мохамед, поранешниот шеф на пропагандата на Ал Каеда, се опиша себеси како мозокот зад операцијата во која беа убиени 2.753 луѓе во Њујорк, 184 во Пентагон и 40 патници на летот 93 на Јунајтед ерлајнс.
Мухамед и другите обвинети претходно постигнаа договор со обвинителството за да ја избегнат смртната казна. Пресвртот се случи кога беше откриено дека агенти на ЦИА брутално ги мачеле додека биле во притвор, вклучително и со симулирано давење (вотербординг), што целосно го комплицирало и контаминирало целото судење.
Министерот за одбрана на САД, исто така, одговараше на прашања за војната со Иран, која беснее веќе петнаесет недели и не покажува знаци дека ќе заврши. Ова се случува и покрај постојаните најави на претседателот Доналд Трамп дека мировниот договор е близу.
Кога новинарите го притиснаа за дали воздушните напади на САД ќе бидат насочени кон цивилната инфраструктура – што претставува воено злосторство според Женевските конвенции – Хегсет одби да ги открие целите. Наместо одговор, тој одлучи вербално да го нападне новинарот кој го постави прашањето.
„Токму таков вид на подли и неискрени прашања сум навикнат од медиумите. Вашата цел е само да ги оцрните мотивите на луѓето на наша страна. Ќе ги удриме силно, според наши услови, и ќе погодиме цели што ќе ни го олеснат дејствувањето на терен и уништувањето на капацитетите што Иран сака да ги развие“, остро одговори Хегсет.
Само два дена откако Трамп со сигурност тврдеше дека САД се на „два или три дена“ од постигнување договор и завршување на војната, американската војска повторно го ракетираше својот блискоисточен непријател, оправдувајќи го тоа како „самоодбрана“.
Самиот Трамп во среда му рече на дописникот на Фокс њуз, Треј Јингст, дека всушност бомбардирањето ќе престане за некое време, но тој исто така упати и брутална закана до иранските власти: „Ако не потпишат мировен договор, ќе ги бомбардираме до смрт“.
