Во документот се наведува дека киднаперите имале контакти со државјани на Саудиска Арабија во САД, но нема докази дека високи претставници на саудиската влада учествувале во планирањето на нападите, пренесе АП.
На денот на одбележувањето на 20-годишнината од нападот, ова е прв документ од истрагата на ФБИ што е објавен откако американскиот претседател Џозеф Бајден нареди да се отстрани ознаката „доверливо“ од материјали што со години беа недостапни за јавноста.
Документот на 16 страници содржи разговор помеѓу оперативци на ФБИ и човек што често контактирал со Саудијците во САД, кои им помогнале на првите киднапери да дојдат во Америка, пред нападот.
Минатата недела, Бајден нареди Министерството за правда и другите агенции да извршат декласификација на ревизијата и јавно да ги објават документите што може да бидат објавени во следните шест месеци.
Тој беше под притисок на семејствата на жртвите, кои долго време ги бараа извештаите додека водат судски спор во Њујорк, тврдејќи дека лидерите на саудиската влада ги поддржале киднаперите.
Редактираниот документ беше објавен во саботата навечер, неколку часа откако Бајден присуствуваше на комеморативните собири во Њујорк, Пенсилванија и северна Вирџинија.
Роднините на жртвите претходно се спротивставија на присуството на Бајден на комеморацијата, сѐ додека документите се доверливи.
Саудиската влада долго време негираше каква било вмешаност во нападите, а нивната влада во Вашингтон го поддржа целосното откривање на сите извештаи, со цел да им се стави крај на „неоснованите обвинувања против таа земја еднаш засекогаш“.
Амбасадата додаде дека кое било обвинување дека Саудиска Арабија е соучесник е „категорично невистинито“.
Од 19 киднапери, дури 15 беа државјани на Саудиска Арабија.
